Takim mbi ekspozitën “Shqipëria, Athleta Christi” në Rimini. Në mikrofonin tonë, prof.
Ardian Ndreca
Sot në orën 19, në Takimin e Riminit të Lëvizjes kishtare “Bashkim e Çlirim” paraqitet
zyrtarisht ekspozita “Shqipëria, Athleta Christi. Rrënjët e lirisë së një populli”,
për të cilën kemi folur edhe në ditët e kaluara. Ajo është hapur të dielën dhe do
të përfundojë të shtunën, më 25 gusht, me synim të japë një ide për kontributin e
krishterimit në historinë e Shqipërisë e në krijimin e identitetit të popullit shqiptar.
Me tri ikona, përshkruhet historia e krishterimit në Shqipëri, përfshirë persekutimin
komunist, duke hedhur tezën se shqiptari i kohës së demokracisë do ta kuptojë plotësisht
cili është identiteti i tij vetëm nëse pranon se rrënjët e lirisë së vet gjenden në
fenë shumëshekullore të të parëve. Përveç dy prej organizatorëve të ekspozitës,
shqiptarit Teodor Nasi dhe italianit Xhorxho Paoluçi, kryeredaktor i gazetës kishtare
“Avvenire”, marrinn pjesë dhe flasin në takim, Ardian Ndreca, pedagog i filozofisë
dhe drejtor i Institutit për Studimin e Ateizmit në Universitetin Papnor Urbanian,
si edhe Agron Tufa, drejtor i Institutit për Studimin e Krimeve dhe të Pasojave të
Komunizmit në Tiranë. Këto ditë në Miting janë të pranishëm gjithashtu, kryeipeshkvi
metropolit i Shkodrës, imzot Anxhelo Masafra dhe ipeshkvi i Kosovës, imzot Dodë Gjergji. Por
për çfarë flitet në këtë mbrëmje, në të cilën marrin pjesë shumë njerëz, italianë
e shqiptarë, ardhur enkas nga veriu i Italisë për të ndjekur ekspozitën. Folëm
telefonikisht me Ardian Ndrecën….....