Pax Christi e Këshilli Ekumenik i shkruajnë OKB-së: të ndërhyhet në Jeruzalem për
një paqe të qëndrueshme
Një deklaratë e përbashkët, ku kërkohet zgjidhje paqësore dhe e qëndrueshme për qytetin
e Jeruzalemit i është dërguar OKB-së me një letër të hapur nga organizata kishtare
“Pax Christi International” dhe nga Këshilli Ekumenik i Kishave. Në prag të sesionit
të 21-të të Këshillit të OKB-së për të drejtat e njeriut, që do të mbahet në Gjenevë
nga 10 deri më 28 shtator, u kërkohet Kombeve të Bashkuara të sigurojnë lirinë e qarkullimit
për banorët e Jeruzalemit, të emërojnë një të dërguar të veçantë për qytetin dhe të
miratojnë një rezolutë për respektimin e të drejtave të njeriut e të ligjeve ndërkombëtare,
sidomos në Jeruzalemin Lindor. Jeruzalemi ka një status të veçantë për shkak
të rëndësisë së tij për të tria fetë kryesore monoteiste: krishterimin, hebraizmin
dhe islamizmin. Izraeli ushtron sovranitetin e vet mbi Jeruzalemin Perëndimor dhe
e ka shpallur krejt qytetin, duke përfshirë edhe Jeruzalemin Lindor, në pjesën palestineze,
si kryeqytetin e vendit, natyrisht pa përkrahjen e bashkësisë ndërkombëtare, që konsideron
kryeqytet Tel Avivin. Në bisedimet për paqe ndërmjet izraelitëve dhe palestinezëve,
statusi i ardhshëm i Jeruzalemit shkakton kundërshti të jashtëzakonshme.