Vatikani konfirmon udhëtimin e Benediktit XVI në Liban e përcjell nga afër zhvillimet
e krizës në Siri. Pra “përgatitjet për udhëtimin e Papës në Liban vazhdojnë pa asnjë
lëkundje nga ana e Vatikanit”: pohimi është i zëdhënësit të Sallës së Shtypit të Selisë
së Shenjtë, atë Federiko Lombardi dhe u jep përgjigje hamendjeve të disa mediave që
shkruajnë për anullimin e shtegtimit apostolik. Papa Benedikti XVI pritet në Vendin
e kedrave nga data 14 deri më 16 shtator, kryesisht për të nënshkruar dokumentin kishtar,
‘Nxitjen Apostolike’ pas Sinodit të Ipeshkvijve për Lindjen e Mesme e për t’ua dorëzuar
atë ipeshkvijve dhe klerit katolik të zonës. Është fjala për dokumentin që përmbledh
propozimet e reflektimet e ipeshkvijve të rajonit që kanë dal nga sinodi mbajtur para
dy vjetësh në Vatikan mbi Lindjen e Mesme. Atë Lombardi iu përgjigj pyetjeve të
Agjencisë “France Press” (AFP), e cila ka shpreh frikën e disa ambienteve për anulimin
e udhëtimit papnor, për shkak të pasojave që mund të ketë kriza siriane mbi Libanin.
“Shenjë konkrete për faktin se përgatitjet vazhdojnë – nënvizoi mes tjerash atë Lombardi
– është autovetura papamobili, nisur tashmë për në Bejrut”. Përgatitja për realizimin
e udhëtimit të Papës po çohet përpara si nga Kisha maronite e Libanit e po kështu
edhe nga pjesa dërmuese e komunitetit mysliman, është fjala për dy komponentë të shoqërisë
libaneze që e shohin vizitën e Papës si rast të volitshëm për ta pranuar e propozuar
mesazhin e paqes, me rëndësi edhe për mbarë Lindjen e Mesme.