Kryeipeshkvi i Lagosit në Nigeri: qeveria të dialogojë me sektin Boko Haram
Qeveria e Nigerisë të kërkojë dialogun me fondamentalistët islamikë të sektit Boko
Haram, sepse lufta nuk ka sjellë kurrë paqe të qëndrueshme në historinë e njerëzimit.
Këto janë fjalët e kryeipeshkvit të Lagosit, imzot Alfred Adeuale Martins në shtypin
lokal, ndërsa goditej nga dhuna e integralistëve shkolla katolike e Damagunit. Episode
të turpshme, kryer nga njerëz të neveritshëm, thekson imzot Martins, duke nënvizuar
se Islami është fe e paqes, ndërsa këta që ushtrojnë dhunë kundër vëllezërve të tyre
nigerianë nuk janë myslimanë të vërtetë, por terroristë. Kryeipeshkvi i Lagosit
i bën thirrje qeverisë së vendit të veprojë me vendosmëri kundër sulmeve të tilla,
pa e lënë mënjanë udhën e ndërmjetësimit e të dialogut, pasi është më mirë kur palët
ulen në tryezë për të paraqitur opinionet e tyre. Imzot Martins i fton të gjithë besimtarët
t’i luten Zotit për paqen e më pas, ndalet në rolin e shtypit, i cili ka qenë shumë
i rëndësishëm në të kaluarën për t’i treguar popullit rrugën e demokracisë. Edhe sot,
shpjegon prelati, duke kritikuar ashpër sulmet e fundit kundër profesionistëve të
lajmit, mass mediat mund të mobilizojnë, përforcojnë e nxisin vlerat pozitive të shoqërisë,
prandaj ai i kërkon qeverisë të mbrojë të drejtat e gazetarëve dhe jetën e tyre, duke
u dhënë kështu mundësi të plotësojnë detyrën e edukimit, të informimit e të argëtimit
të popullsisë, mision i çmuar për zhvillimin e një kombi.