Ամենայն Հայոց Կաթողիկոսի Հովուապետական Այցը Ռումինիա Եւ Ուկրաինա

Ամենայն Հայոց Կաթողիկոս Գարեգին Բ. 10 -15 Օգոստոս հովուապետական այց կատարեց Ռումինիա եւ Ուկրանիա։
Վեհափառի հանդիսապետութեամբ տեղի ունեցաւ Սուչաւայի Հաճկատար Սբ Աստուածածին վանքի վերաօծման արարողութիւնը եւ հիմնադրման 500-ամեակի տօնակատարութիւնները։
Ամենայն Հայոց Կաթողիկոսի ձեռամբ կատարուեցաւ հայ գրքի 500-ամեակին նուիրուած ցուցահանդէսի բացում Ռումինիայի հայոց թեմի Դուդեան Մշակութային կենտրոնի թանգարանային մասնաբաժնի մէջ, ուր ներկայացուած էին հայ հնատիպ եւ Ռումինիոյ մէջ տպագրուած գրքերը։
Նաեւ վեհափառի օրհնութեամբ եւ բարձր նախագահութեամբ տեղի ունեցաւ վերանորոգուած առաջնորդարանի բացումը։
11 Օգոստոսին Ամենայն Հայոց Կաթողիկոսի Ուկրաինայի հայոց թեմ հովուապետական այցին՝ Չերնովեց քաղաքի մէջ ,Վեհափառը իր օրհնութիւնն ու բարեմաղթանքները փոխանցեց Ուկրաինայի ողջ տարածքէն ժամանած մեծաթիւ ուխտաւորներու նաեւ՝ հանդիպում ունեցաւ Չերնովեցի նահանգային վարչութեան ղեկավար Միխայիլ Պապիեւի հետ, որուն ընթացքին խօսուեցաւ հայ-ուկրաինական ջերմ յարաբերութիւններու եւ ուկրաինահայ համայնքի մասին։
Օգոստոսի 12-ին Վեհափառ Հայրապետի ձեռամբ տեղի ունեցաւ Սուչաւայի Հաճկատար Սբ Աստուածածին վանքի վերաօծման արարողութիւնը, որմէ ետք մատուցուեցաւ Հայրապետական Սբ Պատարագ։ Արարողութեան ներկայ էին Կրօնի նախարարը, Քոյր Եկեղեցիներու ներկայացուցիչներ, Սուչաւայի նահանգային իշխանութեան անդամներ ինչպէս նաեւ՝ հայ եւ ռումինացի բազմաթիւ ուխտաւորներ։
Հաճկատարի յոբելեանական միջոցառումներու շրջանակին մէջ 14 օգոստոսին Ռումինական Ակադեմիայի Մեծ սրահին մէջ, տեղի ունեցաւ հայ-ռումինական համատեղ դրոշմանիշի թողարկման հանդիսաւոր արարողութիւնը, նուիրուած՝ Սուչաւայի Հաճկատար Սբ Աստուածածին վանքի հիմնադրման 500-ամեակին եւ այդ կապակցութեամբ Ամենայն Հայոց Կաթողիկոսի հայրապետական այցելութեան։ Հուսկ՝ 15 Օգոստոսին Ամենայն Հայոց Կաթողիկոսը վերադարձաւ Մայր Աթոռ Սուրբ Էջմիածին։