Նոր Աւետարանացումը Եւ Քրիտոնէական Հաւատքի Փոխանցումը
Նոր աւետարանացումը եւ քարոզելու արուեստը Ամէն գործ, ամէն զբաղում,
իր արտայայտութեան յատուկ ձեւերն ու եղանակները ունի: Խօսիլը մարդոց ամէնէն կենսական
գործն ու զբաղումն է եւ ունի իր արտայայտութեան աստիճանները, ձեւերն ու եղանակները, տեղն
ու ժամանակը. այնպէս որ՝ երբ չյարգուին այդ պայմանները՝ խօսքը իր հասարակ շրջանակէն դուրս
չ՛ելլեր: Քարոզն ալ՝ երբ խօսք կամ խօսուածք՝ ունի իր արտայայտութեան ձեւերն ու եղանակները,
մէկ խօսքով ունի իր արուեստը, զոր կարելի եղածին չափ պէտք է լա՛ւ գիտնալ, որպէսզի յաջողի
թէ՛ քարոզը եւ թէ՛ քարոզիչը: Բայց ամէն դիւրամացութիւն փարատելու համար դիտելու է՝
որ քարոզն ու քարոզիչը միմիայն արուեստով չեն յաջողիր: Եկեղեցւոյ բեմին վրայ խօսածները
պէտք է որ ամէնէն առաջ խորունկ համոզումէ մը բխին. այս տեսակ խօսուածներն են՝ որ երբ
կ՛արտայայտուին արուեստով, ո՛չ միայն անխուսափելի կ՛ըլլայ յաջողութիւնը, այլ մանաւանդ
հիանալի: Հետեւաբար, քարոզի յաջողութեան բուն հիմն է համոզումը: Երբ քարոզիչ հայրը չէ՛
համոզուած իր խօսածներուն, որչափ ալ արուեստով արտայայտուած ըլլան անոնք, շինիչ յաջողութիւն
մը չեն երաշխաւորեր բեմի վրայ: Դժբախտաբար, հայ մատենագրութեան մէջ քարոզելու արուեստը
սորվեցնող գործ մը չունինք: Մեր քարոզիչները միշտ գործնականօրէն պատրաստուած են բեմի,
վարդապետի ձեռքին եւ հսկողութեան տակ: Եւրոպական մատենագրութեան մէջ այս տեսակ գործեր
կան, որոնք արդիւնք են մեծ քարոզիչներու ուսումնասիրութիւններուն, մանաւանդ փորձառութիւններուն: կ՛ուզենք
քանի մը կարեւոր եւ ընդհանուր կէտեր մատնանշել քարոզելու արուեստին մասին. ա- Քարոզը
կը հիմնուի Ս. Գիրքի վրայ, մասնաւորապէս Նոր Կտակարանի վրայ: Եւ ճիշդ այդ պատճառով է,
որ Ս. Գիրքի ընթերցումէն ետքը քարոզիչը բեմ կ՛ելլէ եւ օրուան ընթերցուներէն կ՛ընտրէ իր
քարոզին բնաբանը: բ- Քարոզի օրերը ընդհանրապէս տէրունի եւ հանդիսաւոր օրեր եղած են,
իսկ ժամանակը՝ առտուները ճաշու ժամերգութեան մէջ՝ պատարագէն առաջ եւ Սուրբ Գրոց մարգարէական
եւ առաքելական ընթերցումներէն ետքը: Երեկոները, որ ընդհանրապէս Մեծ Պահքի Կիրակիներուն
կ՛ըլլայ, ժամերգութենէն ետքը: գ- Հայաստանեաց Եկեղեցւոյ քարոզիչը, Եպիսկոպոս կամ վարդապետ,
անպատճառ կ՛առնէ իրեն իշխանութեամբ տրուած գաւազանը: Քահանայ քարոզիչներ խաչ կ՛առնեն
առհասարակ իրենց ձեռքը, սարկաւագներ՝ Աւետարան: դ- Հայաստանեաց Եկեղեցւոյ պաշտօնական
լեզուն թէեւ գրաբար է, բայց բեմի համար միշտ պէտք եղած է ժողովուրդի հասկցած լեզուով
խօսիլ: Այնպէս որ նախնեաց գրաբար քարոզներուն քով գեղջուկ կամ խոշոր (աշխարհաբար) լեզուով
գրուածներ ալ պակաս չեն: ե- Նախնեաց բեմական արդիւնքները կը կրեն ընդհանրապէս մեկնողական,
ջատագովական, ներբողական աշխատութիւններու կնիքը. մեծ ուշադրութիւն կայ ունկնդիրներու
զգացումներուն տիրելու եւ բարոյական արդիւնքները այդ ուղղութեամբ երեւան բերելու ժողովուրդին
մէջ: Այս մի քանի կէտերը կը բնորոշեն Հայաստանեաց եկեղեցւոյ բեմի վրայ տիրող քարոզախօսութիւնը:
Մեկնութիւնը, ջատագովութիւնը, հետզհետէ եղանաւորուած են եւ հիմա զուտ բարոյական ճիւղը
աւելի կը շեշտուի մեր բեմերուն վրայ՝ այդ ուղղութեան համեմատ մեկնելով կամ գործածելով
Ս. Գիրքը: