Njëqind vjet Pavarësi. Virtytet tradicionale të shqiptarit: Trimëria
Nuk janë malet e vrazhda as jeta e vështirë, që e bëjnë malësorin në veçanti, e shqiptarin,
në përgjithësi, guximtar e të fortë. Është virtyti i trimërisë, që ia forcon zemrën,
ia mbush syrin me shkëndija e shpirtin me guxim, aq sa të mos i trembet asnjë armiku,
asnjë rreziku, as luftës, as gjakut, as vdekjes. Trimëria është virtyt, që ia mban
njeriut moralin lart në çdo rast; e bën krenar, e nxit t’i besojë vetes, madje deri
në tepri, t’i bëjë ballë çdo së keqeje, me çfarëdo fytyre t’i paraqitet në shtigjet
e rrëpirta të jetës. Trimëria shfaqet papritmas, jo ‘me të shtëna pushke”, por
me qëndresë para vështirësive e vuajtjeve. Kur trimëria lidhet me burrërinë, atëhere
vlera e saj është shumë më e madhe. Dy virtyte bashkë bëhen mbrojtje për vete, për
shtëpi e për vëllazëri. Mjerisht ka ndodhur shpesh që trimëria, e zhveshur nga
burrëria e urtia, në një hov zemërimi, i cili ia verbon mendjen edhe më trimit, ka
zhytur në gjak jo vetëm dy tri shtëpi, por edhe mbarë fisin. “Trimi i mirë kurrë nuk
ngutet/ prej urtisë e jo prej tutet”. Në traditën shqiptare, fëmijët rriten që
të vegjël me këtë virtyt, e jo vetëm djemtë, por edhe çikat. Gratë e maleve, e përgjithësisht
gratë shqiptare, u shquan gjithnjë për trimëri. Nuk ua përtuan kurrë ngatërresave
e fjalëve, edhe nëpër vringëllima taganash e nëpër flakë pushkësh. Kujtesa e popullit
e skaliti trimërinë e tyre në rrëfenja, që përshkuajnë gra guximtare e trimëresha,
të gatshme për të mbrojtur veten e trojet e veta, duke luftuar me këmesa e sopata,
pa u trembur, e duke marrë pjesë edhe ndër lufta, krah për krah me burrat e vendit. Shqiptari
nuk i harron, e nuk duhet t’i harrojë bëmat e trimave e të trimëreshave të veta. I
përmendë e i kujton me këngë, që i qet vetë e i përsërit me dëshirë në festa, në raste
të gëzueshme e kurdoherë: duke bërë rrugë, në pushime me shoqëri e në çaste të tjera,
kur kënga i jep zemër të përballojë edhe rreziqet më të mëdha. Këto këngë, të shoqëruara
me lahutë, çifteli e edhe me fyell, janë të shumta e mbeten menjëherë në kujtesën
e fëmijëve, që i mësojnë përmendësh pa mundim, duke bërë edhe efektin e dëshëruar,
sepse secila prej tyre tregon edhe ngjarjen. E shpesh ngjarja është më e rëndësishme
se vetë kënga. Po sjellim këtu, si shembull, përmbledhjen e Këngës së mirënjohur
‘Tringa’ nga “Lahuta e Malcís” e atë Gjergj Fishtës, duke u ndaluar shkurtimisht tek
tregimi në prozë, që i paraprin, realizuar nga atë Daniel Gjeçaj: “Natën Mark
Milani rrethon Nokshiqin e páarmë. Ushtria shqiptare, nga Sutjeska, asht për rrugë
kah pozicionet e reja. Në të zbardhun të dritës tetë taborre malazeze shpërthejnë
sulmin mbi popullsínë e fshatit. Gjithkah ushtarë, që djegin kulla e kasolla, plaçkisin
e vrasin; malazeze të ngarkueme randë me rraqe të grabituna; pleq e fëmijë, që ikin;
shtasë të turituna, që marrin malin. Në gjith ketë mnerë e trishtim, vetëm një kullë
e bardhë dy ketesh rrin në kambë e qetë dhe qet tim, si përherë, në heshtmin e agimit.
Një vashë, që del në oborrin e shpisë dhe duket ma e hieshme se drita e agsholit,
i tërhjek vërejtjen autorit... Asht e motra e Curr Ulë Keqotës, bíjë malsie, që në
zemër ndryn virtytet mashkullore të votrës fisnike. Tringë e ka emnin vasha, që
jetën e rininë ia kushtoi të vetmit vllá, tash një vjetë në të shtrueme prej një varre
me Shkjé. Ngjarja e soçme e gjên të smuetin në çasat e fundit. S'din kurrgjâ për çka
asht tue ndodhë, sadoqë Tringa sheh mirë fatin, që e pret atê e vetin. Kjo don të
shfrejë në váj, por diçka ia xên frymën. Kujdesi i të vllát, që po ia mbysin në shtrat
të dekës, fati i saj robinë e e shnderueme, marrja që do t'u sjellte eshtënve të bekuem
të dekunve, janë kujtimet që e ndrydhin. .. Ndërkaq zhurma e vigma e anmikut ndihet
përherë e ma afër... E vasha, tue i lypë Zotit ndihmë e të falun, rrokë hutën dhe
del te dera. Gjuro Kokoti me një çetë Shkjé hudhet kah ajo për ta kapë me dorë. Vasha
sokoleshë kthen hutën, hjek gisht, si burrë, dhe shkjau rrëxohet brîs. Fishkullojnë
për rreth novicat malazeze. Tringa shtjen fishekun e dytë dhe merr të tërhjekë. Një
plumb mizuer ia lkuqë ballin e gjanë dhe bija shqiptare, lá në gjak, rrxohet te praku
i derës, por Shkjevet s'u bjen në dorë”. Fjalë të urta për Trimërinë Trimëria
e kthen plumbin mbrapsht. Trimi e ka me vete fatin. Trimin vraje, po mos e shaj. Trimi
s’ka dy faqe. Trim nuk i thonë çdo mashkulli. Trimi nuk flet me dy gjuhë.
Trimi s' koritet për një lugë gjak. Trimi nuk lidhet për ushkuri.Trimi s’i
liron ushkurët. Trimi i mirë me shokë shumë.Trim është ai që fal gjak, jo që merr
hak.