“Неабходна змяніць
саму танальнасць адносін паміж Польшчай і Расіяй і іх народамі. Каб змяніць гэтую
танальнасць, трэба вымавіць адно слова: “прабач”, - сказаў Патрыярх Маскоўскі і ўсяе
Русі Кірыл у інтэрв’ю польскім СМІ напярэдадні свайго візіту ў Польшчу. Па словах
Патрыярха, прабачэнне не з’яўляецца забыццём. “Мы не забываем пра гісторыю і спадзяемся,
што ў новым клімаце, (...) гісторыкі будуць глядзець на наша складанае драматычнае
мінулае ў кантэксце прымірэння двух народаў”, - падкрэсліў Прадстаяцель.
Як
адзначыў Патрыярх, за шматвяковую гісторыю адносін дзвюх краін было шмат журботнага
і радаснага, і нярэдка кожны з бакоў бачыў у сваім суседзе “прычыну ўсіх бед”. “Назапасілася
шмат усяго за гэтыя стагоддзя. У той момант, калі свет глабалізуецца, калі зямны шар
ператвараецца ў адну вялікую кватэру, развіваюцца эканамічныя адносіны паміж нашымі
краінамі, і будуць развівацца, што рабіць з гэтым багажом? Настальгаваць па праблемах,
пастаянна верадзіць рану?”, - задаў ён рытарычнае пытанне.
На думку Кірыла
І, ініцыятыва двух Цэркваў па прымірэнні павінна быць падтрымана людзьмі, у тым ліку
інстытутамі грамадзянскай супольнасці, урадамі, прадстаўнікамі бізнесу, культуры,
адукацыі, навукі. Ён лічыць, што ў працэсе прымірэння мала адных чалавечых намаганняў
– “вернікі павінны звярнуцца да сілы Божай, моцна маліцца аб прымірэнні нашых народаў,
але каб гэта было шчыра, сардэчна, мы як людзі павінны зрабіць нейкі крок”.
Патрыярх
лічыць, што паколькі Польшча – пераважна каталіцкая краіна, належыць да каталіцкай
заходняй культуры, “гэтую паездку таксама варта разглядаць у больш шырокім кантэксце
праваслаўна-каталіцкіх адносін”.