Papa në Engjëllin e Tënzot: në Marinë kundrojmë lumninë, që na pret.
Në lutjen e Engjëllit të Tënzot, kremtuar në Kastel Gandolfo, Papa vijoi refkletimin
për festën e Të Ngjiturit të Zojës në Qiell, që kremtohet në zemër të muajit gusht,
si në Kishat e Lindjes, ashtu edhe në ato të Perëndimit. Kremtimi, me rrënjët thellë
në historinë e fesë e të kultit të shekujve të parë të Kishës, buron nga devocioni
për Nënën e Zotit, që u përhap me shpejtësi në të gjitha bashkësitë e krishtera.
Që
nga shekulli IV e fillimi i shekullit V, vërejti Papa, kemi dëshmi të autorëve të
ndryshëm, që pohojnë besimin se Maria është në lumninë e Hyjit me gjithë vetveten,
me korp e me shpirt, por festa ndërroi pamje e u quajt e ‘dremitjes’; e ‘përgjumjes’,
e ‘kalimit’ e ‘Ngjitjes së Nënës së Zotit, Theotòkos’, në qiell, vetëm në shekullin
VI, duke nisur nga Jeruzalemi e duke u përforcuar me Koncilin e Efezit, në vitin 431.
Nisi që asokohe të kremtohet si çasti kur Maria doli nga skena e kësaj bote, e lumnuar
me korp e shpirt në Qiell, në Hyjin.
Papa nënvizoi, pastaj, se për ta kuptuar
Të Ngjiturit e Zojës në Qiell, duhet të kujtojmë Pashkët, Misterin e madh të shëlbimit
tonë, që shënon kalimin e Jezusit në lumninë e Atit, përmes mundimeve, vdekjes e ngjalljes.
Maria, në gjirin e së cilës u mishërua Biri i Hyjit, është krijesa më e shkrirë në
këtë mister, e shëlbuar që në çastin e parë të jetës, e bashkuar në mënyrë të pashoqe
me mundimet dhe lumninë e Birit të vet. Të ngjiturit e Zojës së Bekuar në Qiell është
edhe mister i Pashkëve të Krishtit, realizuar plotësisht në Marinë. Ajo është ngushtësisht
e bashkuar me Birin e saj të ngjallur, ngadhënjimtar mbi mëkatin e mbi vdekjen, e
njëjtësuar me Të. Por Ngjitja në Qiell është një realitet, që na përket edhe ne, sepse
na tregon qartë fatin tonë, fatin e njerëzimit e të gjithë historisë së tij. Në Marinë
kundrojmë pikërisht këtë realitet lumnimi, për të cilin është i thirrur secili nga
ne, e mbarë Kisha. Më pas Papa vërejti se fragmenti i Ungjillit të Shën Lukës,
që lexojmë në liturgjinë e këtij solemniteti, na bën ta shikojmë rrugën që përshkoi
Viurgjëra Mari për t’u lartuar në lavdinë e Zotit. Është rrëfim ungjillor për vizitën
e Marisë tek Elizabeta (cfr Lk 1,39-56) në të cilën Zoja quhet e bekuar mbi
të gjitha gratë. E bekuar, sepse besoi në përmbushjen e fjalëve të Zotit. E në këngën
“Zemra ime madhëron Zotin” (Magnificat), që Vasha e Nazaretit i larton Hyjit, duket
qartë feja e saj e thellë. Ajo e radhit veten ndërmjet të varfërve e të përvuajturve,
që nuk mbështeten mbi forcat e veta, por lëshohen plotësisht në dorë të Zotit, ia
lënë shtegun hapur, që të kryejë vepra të mëdha, në ligështi. Zoja e Ngjitur në
Qiell na kujton ardhmërinë e ndritshme, që na pret, por edhe na fton t’ia besojmë
më shumë vetveten Zotit, t’ia dëgjojmë Fjalën, ta kërkojmë e të bëjmë çdo ditë vullnetin
e tij: është kjo udha, që të bën të lum në shtegtimin tokësor e të hap edhe portat
e Qiellit. Papa kujtoi edhe pohimin e Koncilit II të Vatikanit: “Maria e ngjitur
në qiell, me ndërmjetësimin e saj të gjithanshëm, vijon të na nxjerrë nga Zoti hirin
e shëlbimit të amshuar. Me dashurinë e saj amtare kujdeset për bijtë e Birit, që vijojnë
shtegtimin ndërmjet rreziqesh e mjerimesh, derisa të arrijnë në atdheun e lum” (Lumen
gentium, 62). E më pas, Papa iu lut Virgjërës Mari të jetë yll për hapat tonë,
të na prijë drejt takimit me Birin e saj, në shtegtimin për të arritur në lumninë
e Qiellit, në gëzimin e pasosur”.