Святы Пасад супраць спекуляцыі прадуктамі харчавання
27 жніўня адбудзецца
сустрэча кіраўнікоў краін “Вялікай дваццаткі”. Яны збяруцца, каб абмеркаваць сітуацыю
з павышэннем коштаў на прадукты харчавання, якое зноў пагражае свету. У інтэрв’ю нашаму
радыё аб небяспечнасці сітуацыі расказаў арцыбіскуп Сільвана Тамазі, пастаянны назіральнік
Апостальскай Сталіцы пры ААН у Жэневе. Іерарх адзначыў, што статыстыка кажа аб даволі
сур’ёзных наступствах харчовага крызісу: у свеце налічваецца каля 170 млн. дзяцей,
аслабленых хваробамі ўзнікшымі ў выніку недаядання. Ён нагадаў, што існуюць краіны,
амаль усё насельніцтва якіх пакутуе ад голаду, напрыклад Емен, дзе галадае каля 10
млн. чалавек. З іх каля 260 тыс. дзяцей маюць сур’ёзныя праблемы са здароўем або знаходзяцца
пад пагрозай смерці. Падобная сітуацыя назіраецца ў Сахелі, Самалі і Паўднёвым Судане.
“У той час як ААН заявіла аб неабходнасці 8 млрд. долараў, для вырашэння актуальных
праблем, было сабрана толькі каля 4 млрд.”, - паведаміў іерарх і дадаў, што “праблема
застанецца і нават узрасце ў сувязі з надыходзячым новым крызісам”. Паводле яго, апошні
будзе выкліканы малым ураджаем у краінах, якія з’яўляюцца галоўнымі экспарцёрамі харчовых
прадуктаў у свеце: ЗША, Аўстраліі і Расіі. Гэта паўплывае на рост коштаў і можа, як
ў 2008 г., прывесці да сацыяльных пратэстаў у многіх краінах свету.