Sulmet kundër kishave në Nigeri. Kryeipeshkvi i Abuzhës: strategji për përçarjen e
myslimanëve dhe të të krishterëve
Nuk dihet akoma cilët janë autorët e sulmit të kësaj jave kundër një kishe ungjillore
në Nigeri, ku mbetën të vrarë 9 vetë. Edhe më 8 korrik, një aksion i sektit integralist
islamik “Boko Haram” shkaktoi vdekjen e 22 vetëve në shtetin e Platosë. Sipas kryeipeshkvit
të Abuzhës, imzot Xhon Onajekan, po përpiqen të fusin grindje ndërmjet myslimanëve
e të krishterëve: Nuk është e
lehtë ta kuptosh llogjikën e veprimeve të tyre. E vetmja gjë që më vjen ndërmend,
është se këta njerëz duan të mbjellin çrregullime në vend, duke i vendosur të krishterët
kundër myslimanëve. Duan një kaos të përgjithshëm, ndoshta duke menduar se në një
situatë të tillë, mund t’i zbatojnë lehtë planet e tyre. Kush ka vetëm pak inteligjencë
e kupton se plani i tyre është i pamundur, i parealizueshëm, por fanatikët nuk ndjekin
llogjikën e zakonshme, ky është problemi. Si mund të ndihmojnë krerët fetarë
në ndalimin e këtij fanatizmi? Jam i bindur se problemi nuk është “të krishterët
kundër myslimanëve”, prandaj ngul këmbë që krerët e të dyja palëve të punojnë së bashku
për t’i gjetur dhe për t’i izoluar këto grupe. Myslimanët nigerianë e kanë thënë tashmë
se janë njerëz, që nuk kanë të bëjnë me ta. Nga ana tjetër, qeveria duhet të bëjë
më shumë në fushën e sigurisë. Duket se ndërhyrja e saj po përmirësohet, por akoma
nuk mjafton. Si e jetojnë besimtarët këtë situatë? A s’ka rrezik të mos vijnë
më në meshë, të mos e ndjekin më bashkësinë? Absolutisht jo! Këtu në Nigeri,
të krishterët janë shumë të bindur, të rinj e të rritur. E të gjithë janë gati të
vazhdojnë të shkojnë në kishë. Këto janë episode sporadike, nuk mund të merret vesh
më parë se ku do të godasin. Nuk është konflikt i përgjithshëm ndërmjet të krishterëve
dhe myslimanëve; kemi të bëjmë me veprimtarinë e një grupi terroristësh, që u shkakton
probleme të gjithëve, të krishterëve e myslimanëve. Sulmojnë edhe xhamitë. Në këtë
çast, problemi qëndron në faktin se kjo situatë e bën të vështirë bashkëpunimin ndërmjet
të krishterëve dhe myslimanëve. Ne e mbajmë gjallë dialogun me krerët fetarë, por
nuk duhet harruar aspekti politik. Dëshironi t’u bëni ndonjë thirrje të veçantë
dëgjuesve të Radio Vatikanit? Po: na ndihmoni me lutje! Kemi besim e fe të
madhe në fuqinë e lutjes, që mund t’u ndryshojë zemrat njerëzve. Për ne, është e rëndësishme
edhe që bashkësia e krishterë botërore të ketë ide më të qarta për gjendjen në Nigeri.
Nuk kemi të bëjmë me persekutim të të krishterëve nga ana e myslimanëve. Vendi nuk
është i ndarë në dy grupe, që sulmojnë njëri-tjetrin. Nëse bota do ta kuptonte si
duhet këtë, mund të na përkrahë më mirë në punën për krijimin e një vendi, ku të krishterët
e myslimanët të ecin së bashku.