Si drekoi Shën Kiara me Shën Françeskun e shokët tij në Shën Marinë e Engjëjve.
Shën Françesku, kur ishte në Ashezi, shkonte shpesh për vizitë te Shën Kiara, e i
jepte këshilla shenjte. E megjithqë ajo kishte dëshirë të madhe të hante një herë
me të, e i qe lutur shumë herë, ai nuk donte t’ia jepte këtë ngushëllim. Ndërkaq shokët
e tij, duke parë dëshirën e Shën Kiarës, i thanë Shën Françeskut; “Atë, ne na duket
se gjithë kjo shtrëngesë nuk përkon me dashurinë hyjnore. Pse u dashka të mos ia plotësosh
motër Kiarës, virgjër shenjte, e zgjedhur nga Hyji, një dëshirë kaq të vogël, një
darkë me ne? Nuk duhet harruar se ajo iu përgjigj predikimit tënd, duke braktisur
të gjitha pasuritë e salltanetet e kësaj bote”. Atëherë Shën Françesku u përgjigj:
“Ju mendoni se është mirë t’ia plotësoj këtë dëshirë?”. E shokët: “ Si jo, o Atë,
është gjë e denjë për ty, t’ia japësh këtë ngushëllim!”. Tha atëherë Shën Françseku:
“Mbasi ju mendoni kështu, kështu po mendoj edhe vetë. Por që ajo të ngushëllohet vërtet,
dua që kjo drekë të shtrohet në Shën Marinë e Engjëjve, mbasi ajo ka ndenjur tepër
gjatë e mbyllur në Shën Damian e kështu do t’i çelë paksa sytë duke soditur Shën Marinë,
vendin ku i preu flokët e saj të artë e u bë vasha e Jezu Krishtit: e aty do të hamë
së bashku, në emër të Zotit”. Si i çoi fjalë, Shën Kiara doli nga manastiri, së
bashku me një motër e, e shoqëruar nga vëllezërit e Shën Françeskut, erdhi në Shën
Marinë e Engjëjve. E, si pati përshëndetur me devocion Virgjërën Mari, para elterit
të Saj, ku pati prerë flokët e pati mbuluar kokën me velin e murgeshës, erdhi ora
e drekës. E në këtë mes Shën Françesku e shtroi sofrën përdhe, sipas zakonit. E mbasi
gjithçka ishte gati, u ulën së bashku, Shën Françesku e Shën Kiara e një prej shokëve
të Shën Françeskut e shoqja e Shën Kiarës e pastaj të gjithë shokët, rreth e rreth
sofrës, përvujtërisht. E, para bukës, Shën Françseku nisi të flasë për Zotin aq
mahnitshëm, aq mrekullisht, aq lartësisht sa, duke zbritur mbi ta hiri hyjnor, të
gjithë u rrëmbyen në Zotin. E në sa ata ishin kështu, të rrëmbyer, me krahë të
lartuar nga qielli, banorët e Ashezit e ata të Betonës, që banonin përreth, panë se
Shën Maria e Engjëjve dhe i gjithë vendi e edhe pylli, që rrethonte asokohe vendin,
rrezatonin një dritë aq të fortë, sa kujtuan se kisha, vendi e pylli ishin kallur
flakë. Vrapuan, prandaj, atje, për ta shuar zjarrin, duke besuar plotësisht se gjithçka
po bëhej shkrumb e hi, Por, kur arritën në vend e nuk panë asnjë gjuhë flake, hynë
brenda e gjetën Shën Françeskun, Shën Kiarën dhe gjithë shoqërinë të rrëmbyer në
Zotin, në kundrim të thellë, rreth e rreth kësaj sofre të përvuajtur, me gjellë të
paprekura. Kuptuan, atëherë, se kishte qenë hyjnore e jo materiale, flaka, që Zoti
kishte kallur mrekullisht, për ta bërë të dukshëm zjarrin e dashurisë hyjnore, nga
i cili ishin përflakur shpirtrat e këtyre vëllezërve e të këtyre motrave të shenjta.
U nisën, prandaj, e shkuan, me ngushëllim të madh e me zemrën të mbushur me hirin,
që ndrin, pa djegur! Nësa Françesku, Kiara e mysafirët e asaj sofre, pasi u ngushëlluan,
kështu, me ushqimin shpirtëror, pak e aspak u kujdesën për shujtën trupore, pas së
cilës, Shën Kiara u rikthye rishtas në kuvendin e Shën Damianit, e pritur me gëzim
të madh nga simotrat, që kishin kujtuar se Françesku e kishte nisur në ndonjë kuvend
tjetër, e ishin trembur. Sepse një herë i kishte thënë: “Të jesh gati, në se do të
duhet të shkosh dikund tjetër!”. E Kiara, bijë e bindjes, i kishte gjegjur: “Atë,
unë jam gjithnjë gati për të shkuar atje, ku do të më çoni”. Për lavd e lumni të
Krishtit. Amen!
Marrë nga “I Fioretti di San Francesco”, Frabri Editori, 2001,
Kapitulli XV, fq 102-104