Kremtimet e festës së Shën Kiarës, në Asizi e në Shqipëri.
Sonte, në Asizi, sipas traditës, nisën kremtimet e festës së Shën Kiarës. Në orën
21.00, në shenjtëroren e Shën Damianit, u kremtua mbrëmësorja e lutjes, në përkujtim
të çasteve të fundit të shtegtimit të Kiarës mbi këtë tokë. Kremtimin e kryesoi atë
Bruno Otavi, i Urdhërit të Fretërve të Vegjël, provincial i françeskanëve të Umbries.
Mbrëmësorja u kremtua në kuadrin e festimeve për mbylljen e tetëqindvjetorit të kushtimit
të Shën Kiarës, që nisën më 17 prill 2011 e do të përfundojnë nesër, me një kuvëndim
dhe me kushtimin e një kiostri, në Porciunkola.Tre janë kremtimet e nesërme në program: Në
orën 11.00, në Bazilikën e Shën Kiarës, bashkëkremtimi solemn kryesuar nga kardinali
Agostino Valini, mëkëmbës i Shenjtërisë së Tij për dioqezën e Romës, me pjesëmarrjen
e korit të “Këngëtarëve të Asizit”. Në orën 15.30, në Bazilikën papnore të Shën
Marisë së Engjëjve, në Porciunkola, kremtimi i mbylljes së tetëqindvjetorit dhe përurimi
i Kiostrit të Shën Kiarës, ku do të vendosen shtatë vepra të reja pikture, realizuar
nga piktori Aurelio Bruni; një shtatore e Shenjtores, vepër e skulptorit Piero Kazentini
dhe një vepër, realizuar në majolikë, e Robert Beker. Kushtimi i Kiostrit do të
shoqërohet edhe me një koncert për nder të Shën Kiarës, organizuar nga grupi “Trasimeno
String Quartet” dhe sopranoja Françeska Bruni. Pas koncertit, një pjesë teatrore e
Shoqatës “Kiara e Zotit”. Në orën 18.00, në Bazilikën e Shën Kiarës, Mesha në kujtim
të Kalimit të Shenjtes nga kjo botë, kryesuar nga atë Hosè Rodriguez Karbalo, epror
i përgjithshëm i Urdhërit të Fretërve të Vegjël.Tetëqindvjetori përkujtimor do të
mbyllet me kthimin e relikes së flokëve të Shën Kiarës.