Հայրենի նախագահը կարեւորութեամբ նշեց երկու երկիրներուն յաջող զինուորական-արհեստագիտական
համագործակցութիւնը: Հայաստանի նախագահ Սերժ Սարգսեան եւ Ռուսիոյ նախագահ
Վլատիմիր Փութին երէկ հանդիպում մը ունեցան Մոսկուայի մէջ: Հանդիպման ընթացքին Ռուսիոյ
նախագահը նշեց, որ ռուս-հայկական միջկառավարական յանձնախումբը ձեւաւորուած է եւ անոր
առաջին նիստը տեղի պիտի ունենայ այս տարուան աշնան: Փութին յայտարարեց, որ երկու երկիրներուն
դիմաց դրուած է շատ ճիշդ խնդիր մը` տնտեսութեան մարզին մէջ յարաբերութիւններու զարգացման
ծրագիրը մինչեւ 2020 թուական, ինչպէս նաեւ ստեղծել ճամբու քարտէս: Ըստ Փութինի, ռուսական
կողմէն յանձնախումբը պիտի գլխաւորէ փոխադրութեան նախարար Մաքսիմ Սոքոլով: Ռուսիոյ նախագահը
նաեւ յիշեցուց, որ երկու երկիրներուն միջեւ ապրանքաշրջանառութիւնը 2011 թուականի արդիւնքներով
կազմած է 1 միլիառ տոլար, իսկ ապրանքաշրջանառութիւնը 2012 թուականի առաջին կիսուն նախորդ
տարուան նոյն ժամանակաշրջանին համեմատ աճած է 32 առ հարիւրով: Բացի անկէ, Փութին յայտնեց,
որ Ռուսիոյ մէջ աշխատող Հայաստանի քաղաքացիները ամէն տարի իրենց ընտանիքներուն կ՛ուղարկեն
շուրջ 1 միլիառ տոլար, ինչ որ կը կազմէ Հայաստանի Համախառն ներքին արդիւնքի զգալի մասը:
Իր կարգին, նախագահ Սերժ Սարգսեան ընդգծեց, որ մէկ միլիառ տոլարը երկու երկիրներուն
միջեւ ապրանքաշրջանառութեան համար սահման չէ եւ յառաջիկայ երկու-երեք տարիներուն ատիկա
կարելի պիտի ըլլայ «կրկնապատկել կամ նոյնիսկ եռապատկել»: Հայրենի նախագահը կարեւորութեամբ
նշեց երկու երկիրներուն յաջող զինուորական-արհեստագիտական համագործակցութիւնը: «Մենք
երկարաձգած ենք Հայաստանի մէջ ռուսական ռազմակայանի տեղակայման ժամկէտները: Մենք կը նկատենք,
որ ռուսական ռազմակայանի գտնուիլը Հայաստանի մէջ կը բխի մեր ապահովութեան շահերէն», ընդգծեց
Հայաստանի նախագահը` նշելով, որ այս տարուան աշնան երկրին մէջ տեղի պիտի ունենան զօրավարժութիւններ
Հաւաքական անվտանգութեան պայմանագիրի կազմակերպութեան շրջագիծին մէջ։