Imzot Çelata në Nagasaki, 67 vjet pas bombardimit atomik
“Lutja për viktimat e asaj ngjarjeje të tmerrshme, bëhet përgjërim drejtuar Zotit
që të na dhurojë paqen”: me këto fjalë, imzot Pier Luigji Çelata, Sekretar nderi i
Këshillit Papnor për Dialogun Ndërfetar iu drejtua të pranishmëve në Meshën e kremtuar
në Nagasaki të Japonisë për viktimat e bombës atomike, hedhur më 9 gusht të 67 vjetëve
më parë. Imzot Çelata nënvizoi se besimtarët e feve të ndryshme janë të thirrur të
punojnë së bashku për paqen, duke ofruar kontributin e traditave të tyre shpirtërore.
Në një vend si Japonia, besimtarët bashkohen rreth koncepteve të njëjta si “mëshirë”,
“falje”, “dashuri”, të cilat pasqyrojnë bindjen e të gjithëve se njerëzit i përkasin
së njëjtës familje botërore dhe kanë të njëjtin fat. Japonia i përkujtoi viktimat
e Nagasakit dhe ato të Hiroshimës, pas krizës bërthamore shkaktuar nga centrali i
Fukushimës, që nuk i rezistoi tsunamit të 11 marsit 2011. Prandaj, qyteti, që nderoi
viktimat e bombës atomike me një minut heshtje, i bëri thirrje qeverisë të përcaktojë
objektiva të reja në politikën e vet energjitike, për të ndërtuar një shoqëri të lirë
nga frika e radioaktivitetit.