Աղթամարի Ս. Խաչ Եկեղեցին Կը Պատրաստուի 9 Սեպտեմբերին Մատուցուելիք Պատարագին ։
Վանայ լիճի Աղթամար կղզիի Սուրբ Խաչ հայկական եկեղեցւոյ մէջ այս տարի վերաբացումէն ետք
երրորդ անգամ պատարագ կը մատուցուի: Վանի նահանգապետարանը արդէն սկսած է աշխատանքները
այդ ուղղութեամբ: «Գագիկ Ա. թագաւորի կողմէ 915-922-ին կառուցուած եկեղեցին, վերանորոգուած
է 3 տարի առաջ եւ Թուրքիոյ մշակոյթի եւ զբօսաշրջութեան նախարարութիւնը թոյլատրած է եկեղեցւոյ
մէջ տարին մէկ անգամ պատարագ մատուցել»,- կը յիշեցնէ թրքական Sondakika կայքը: Արարողութիւնը
տեղի կ'ունենայ Սեպտեմբեր 9-ին: Այս օրերուն, Վանի փոխնահանգապետ Աթա Ուսլուի գլխաւորութեամբ
նախապատրաստական աշխատանքներուն նուիրուած ժողով մը գումարուած է: Լրագրողներու հետ
զրոյցին ընթացքին Աթա Ուլսու ըսած է. «Վանի երկրաշարժէն ետք շատերդ օգնութեան ձեռք մեկնեցիք:
Այժմ ալ Վանի մէջ զբօսնելու եկէք: Եկէք, որ տեսնենք, թէ ձեր օգնութեան շնորհիւ Վանը ինչպէս
ոտքի կանգնեցաւ: Բոլորդ կը հրաւիրենք մասնակցելու Աղթամարի պատարագին»։