Ліван перад візітам Папы: рэлігійная мазаіка і талерантнасць
14-16 верасня Бэнэдыкт
XVI наведае Ліван – адзіную “немусульманскую” з 22 арабскіх краін. Большасць жыхароў
Лівана вызнаюць іслам (каля 50-65%) і хрысціянства (35-40%). Ліванскія ўлады афіцыйна
прызнаюць дзейнасць на тэрыторыі краіны 18 хрысціянскіх канфесій, 5 мусульманскіх
супольнасцяў, а таксама юдэйскай. На тэрыторыі Лівана маюць свае рэзідэнцыі чатыры
каталіцкіх Патрыярхі: Мараніцкі, Грэцкі, Армянскі і Сірыйскі. Халдэйская Царква і
Каталіцкі Касцёл тут прадстаўлены біскупамі. Нягледзячы на такую вялікую колькасць
канфесій Ліван характарызуецца мірным суіснаваннем паміж вернікамі і талерантнасцю.
У інтэрв’ю нашаму радыё арцыбсікуп Бейрута Пол Матар распавёў, што і хрысціяне, і
мусульмане з радасцю чакаюць візіта Папы і рыхтуюцца да гэтай вялікай падзеі. “Яны
шчаслівыя прыняць Папу, бо маюць патрэбу ў падтрымцы сваёй надзеі на мір, і не толькі
ў Ліване, але ва ўсім рэгіёне. Тут усе вельмі засмучаны тым, што адбываецца на Блізкім
Усходзе і спадзяюцца, што хутка будуць знойдзена рашэнне па выхадзе з канфлікту. Святы
Айцец – гэта ключавая асоба, якая можа даць надзею не толькі ліванскаму народу, але
ўсяму насельніцтву Блізкага Усходу”, - сказаў іерарх.
Арцыбіскуп Матар падкрэсліў,
што большасць жыхароў Лівана не падтрымліваюць фундаменталісцкіх ідэй і таму адкрыта
ўспрымуць заклік Бэнэдыкта XVI жыць у міры і сяброўстве. “Я думаю, што пасланне Папы
будзе прысвечана менавіта гэтаму”, - прызнаўся ліванскі іерарх.