Nunci Apostolik në Siri imzot Zenari, krerëve fetarë: bashkohuni për të ndalur shtypjen
e dhunën
Pas thirrjes së djeshme të Papës në Lutjen e Engjëllit të Tënzot, për ndaljen e dhunës
në Siri, sot flet edhe Nunci Apostolik në Damask, imzot Mario Zenari. Ai u drejtohet
krerëve fetarë të vendit, që të bëjnë ç’është e mundur për të kontribuar t’i jepet
fund luftës. Ne e ftuam në mikrofonin tonë: Thirrja e Atit të Shenjtë, që të
përfundojë dhuna, ngushëllimi i tij për viktimat, afërsia me vuajtjet e njerëzve,
janë gjithnjë burim shprese të madhe për barinjtë, besimtarët e për gjithë sirianët,
të cilët i janë mirënjohës Papës për interesin, që tregon vazhdimisht për Sirinë,
duke i përsëritur thirrjet për të. Për shembull, për thirrjen e djeshme folën pozitivisht
edhe mediat lokale qeveritare. Dua të nënvizoj theksin e Atit të Shenjtë mbi dramën
e refugjatëve të brendshëm e të atyre, që shkojnë drejt vendeve fqinje e po ashtu,
edhe lutjen e tij që Zoti t’u shndrisë zemrat krerëve përgjegjës në çaste kaq të vështira.
Kjo më duket shumë e rëndësishme. Cila është gjendja në Siri? Luftimet në Haleb,
Damask e në qytetet e tjera akoma vazhdojnë, jashtëzakonisht të ashpra… Atmosfera
është shumë e rëndë. Ka lokalitete tepër të goditura, për të cilat flitet vazhdimisht,
por do të thosha, se kanceri i konfliktit është përhapur në të gjithë Sirinë e njerëzit
kanë frikë e nuk kanë siguri për të ardhmen. Këto ditë po mendoja për hapjen e Lojërave
Olimpike, të cilat i panë miliona njerëz në të gjithë botën, festë e jashtëzakonshme
vëllazërie universale ndërmjet popujve e, nga ana tjetër, e krahasoja me gjendjen
në Siri. Megjithatë, kjo festë e ruan shpresën, flakën e vëllazërimit universal, që
nuk mund të shuhet nga erërat vëllavrasëse, të cilat fryjnë aty-këtu nëpër botë. Aty
ku, përkohësisht, kjo flakë e vëllazërisë universale është shuar, mund të rindizet
një ditë me ndihmën e bashkësisë ndërkombëtare. Cila është thirrja juaj nga
mikrofoni i Radio Vatikanit? Pas thirrjeve të shumta e të zjarrta të Atit të
Shenjtë për ndalimin e dhunës në Siri e për zgjidhjen politike të konfliktit - thirrje,
jashtëzakonisht të vlerësuara – duke e ditur nga përvoja personale se në Siri ekzistojnë
marrëdhënie të mira ndërfetare e se ç’rol luan feja në ato anë, dua t’u drejtohem
të gjithë përgjegjësve fetarë, myslimanë, të krishterë e të tjerë: bashkohuni e me
forcën e autoritetit tuaj moral paralajmërojini në emër të Zotit të gjitha palët në
konflikt, që ta ndalin dhunën, e cila po e çon vendin drejt shkatërrimit, vuajtes
së patreguar e vdekjes. U bëni atyre thirrje të fuqishme, në mënyrë që të kenë guximin
për të ndërmarrë menjëherë, me sinqeritet e me ndihmën e bashkësisë ndërkombëtare,
rrugën që çon drejt zgjidhjes së duhur politike të krizës.