Karitasi ndihmon të shpërngulurit sirianë në Liban, Jordani dhe Turqi

Karitaset kombëtare të rajonit të Lindjes së Mesme janë aktivizuar për të përballuar emergjencën e refugjatëve sirianë, të cilët janë dyndur në vendet fqinje, për t’i shpëtuar konfliktit të ashpër. Ndër mëse 200 mijë refugjatët, 30 mijë kanë shkuar në Liban e qeveria libaneze ka vendosur trupat ushtarake në kufi. Mikpritja organizohet më së shumti nga familjet, shkollat, apo struktura të tjera të këtij lloji. Mëse 9 mijë vetë i janë besuar Karitasit lokal, i cili ka ngritur edhe një klinikë të lëvizshme me pediatër, gjinekologe e infermiere.
Mëse 150 mijë sirianë janë drejtuar ndërkaq, për në Jordani, megjithëse janë regjistruar vetëm rreth 35 mijë. Pra, pjesa më e madhe është strehuar nga miq e dashamirë. Gjithsesi, duke parashikuar ardhje të tjera, në Zaatari, po ngrihet një kamp për 100 mijë vetë. Në Jordani, Karitasi kujdeset për rreth 25 mijë vetë, duke u shpërndarë ushqime, duke u marrë me asistencën shëndetësore dhe atë shkollore për fëmijët.
Në Turqi, kanë mbërritur 43 mijë sirianë, të ndarë në 8 kampe qeveritare. Autoritetet po përgatisin edhe dy të tjera. Këtu, Karitasi punon kryesisht për shpërndarjen e ushqimeve, mbështetjen psikologjike dhe mbrojtjen juridike të refugjatëve pa dokumente. Organizata bamirëse katolike vazhdon punën edhe brenda Sirisë, sidomos në Homs, Haleb dhe në Damask, por me shumë kujdes, për shkak të konfliktit në vazhdim. Nga çdo vend, arrijnë kërkesa për fonde, në mënyrë që kjo ndihmë të vazhdojë, për të gjithë ata që kanë nevojë.