Atë Federiko Lombardi: Lojërat Olimpike të Londrës, më shumë se ar – More than gold
Lojërat Olimpike të Londrës, që filluan ditën e premte, më 27 korrik, kanë eklipsuar
çdo vëmendje tjetër të sportdashësve, duke e përqendruar në stadiumet e në fushat,
ku atletë nga mbarë bota janë në garë për medaljen e artë në disiplinën e tyre. Një
nismë ekumenike e Kishave të krishtera shkon përtej këtij ari. Vërtet, titullohet
“Më shumë se ar”, e kuptimin e saj e sqaron zëdhënësi i Selisë së Shenjtë, atë Federiko
Lombardi, në mikrofonin tonë: “Olimpiada! Edhe një herë, bota i drejton sytë kah
ngjarja sportive më e madhe, më e pritura, më tërheqësja. Edhe Kishat e krishtera
mobilizohen për këtë rast. Që nga Lojërat e Barcelonës, në vitin 1992, ungjillorë,
baptistë, metodistë, episkopalianë kanë ndërmarrë nismën ekumenike “More than Gold
– Më shumë se ar” për të ndërtuar së bashku Mbretërinë e Zotit në atmosferën entuziaste
dhe kozmopolite të Olimpiadave. Këtë vit, edhe Kisha Katolike angleze merr pjesë në
to me plot dëshirë. E të premten paradite, më 27 korrik, të gjitha këmbanat e vendeve
të krishtera të kultit ranë në të njëjtën orë, për t’u uruar mirëseardhjen atletëve,
turistëve, kujtdo, që merr pjesë në këtë ngjarje të jashtëzakonshme dhe për t’i ndihmuar
gjithë këta njerëz t’ia hapin zemrën Hyjit. Çfarë të presim “më shumë se ari”
i medaljeve më prestigjoze, më shumë se admirimi për një sukses, në fund të fundit,
kalimtar? Admirimi për forcën, elegancën, hijeshinë dhe aftësinë e atletëve nuk duhet
të ndalet në kultin e bukurisë së trupit njerëzor, por duhet të kuptojë se ky trup
edukohet dhe udhëhiqet nga mendja e nga vullneti, nga shpirti, që banon në të. Prandaj,
më duket mëse e drejtë të bashkohen Olimpiadat me Paraolimpiadat për atletët me të
meta fizike. Këto të fundit nuk janë më pak se të parat. Janë të nevojshme për të
kuptuar domethënien pozitive të të parave. E drejtë është edhe të bashkohen pazgjidhshmërisht
Olimpiadat me shpresën e paqes për gjithë bashkësinë njerëzore. Kështu thotë qartë
tradita e lashtë e “armëpushimit olimpik”, të cilën Papa e kujtoi në lutjen e Engjëllit
të Tënzot të së dielës së kaluar: “Të lutemi që Lojërat e Londrës të jenë përvojë
e vërtetë vëllazërimi ndërmjet popujve të Tokës!”.