Сірыйскі іерарх: калі Захад хоча дапамагчы – павінен спрыяць дыялогу
“Захад, калі хоча
аказаць добрую паслугу сірыйскаму народу, павінен прыкласці намаганні для дыялога
паміж бакамі”, - адзначыў у інтэрв’ю агенцтву “Fides” грэка-каталіцкі архіепіскап
Халеба ў Сірыі Жан-Клемент Жанбарт. Ён расказаў, што на 28 ліпеня запланавана экуменічная
малітва за мір у гэтай краіне, у якой прымуць удзел мясцовыя каталіцкія, праваслаўныя
і пратэстанскія іерархі, святары і вернікі. “Мы супольна памолімся за мір у Сірыі
і паразважаем аб важных праблемах, напрыклад такіх, як неабходнасць абароны хрысціян
і аказання гуманітарнай дапамогі ўсяму насельніцтву, якое зараз вельмі пакутуе”, -
адзначыў іерарх. Ён падкрэсліў, што ў Халебе, самым буйным сірыйскім горадзе, сітуацыя
застаецца напружанай, але хрысціяне не сустракаюцца з пагрозамі на рэлігійнай глебе.
“Існуе страх перад тым, што сітуацыя можа пагоршыцца і што баевікі ўвойдуць у хрысціянскія
кварталы, аднак пакуль такога не адбывалася”, - сказаў архіепіскап Жанбарт.
Іерарх
заклікаў Захад спрыяць дыялогу паміж бакамі, падштурхоўвываць іх да міра і не падтрымліваць
узброеныя групы, сярод якіх ёсць фундаменталісты. “Не праз зброю прыйдзе дэмакратыя
ў Сірыю”, - адзначыў архіепіскап. Ён расказаў, што зараз краіна падзелена на дзве
часткі ніводная з якіх не мае абсалютнай большасці, таму, паводле іерарха, адзіным
магчымым спосабам вырашэння канфлікта і дасягнення доўгатрывалых вынікаў можа быць
дыялог. Пры гэтым ён падкрэсліў, што развіццё дыялога немагчыма без падтрымкі міжнароднай
супольнасці.