Festa liturgjike e shën Joakinit dhe e shën Anës. Papa: “gjyshërit” e Jezusit, shembull
bashkimi e dashurie ndërmjet brezave
Kisha Katolike kremtoi sot festën liturgjike të shën Joakinit e të shën Anës, prindërit
e Zojës së Bekuar. Në Vatikan, në hyrjen nga ana e portës së Shën Anës, ndodhet një
kishë, që mban emrin e saj, pjesë e famullisë së këtij shteti të vogël. Siç është
tradita, edhe sivjet, vikari i përgjithshëm i Papës për Shtetin e Vatikanit, kardinali
Anxhelo Komastri kremtoi aty një meshë, gjatë së cilës u lut veçanërisht për të gjitha
nënat e botës. Po në këtë kishë, pasdite, në orën 18.00, kremton meshën edhe kreu
i Guvernatoratit të Vatikanit, kardinali Xhuzepe Bertelo. Ndoshta pyetja nuk
është origjinale, por edhe të krishterit më të humbur do t’i ketë shkuar nëpër mend
se ç’do të thoshte për Shën Joakinin e për Shën Anën të ishin ati dhe nëna e Marisë,
gjyshi dhe gjyshja e Jezusit? Ndër përgjigjet e mundshme, që mund t’i jepen kësaj
pyetjeje, një siguri: dashuria që bashkonte anëtarët e kësaj shtëpie të veçantë është
një ikonë, kundrimi i së cilës na bën të kuptojmë bukurinë e lidhjeve familjare, në
një kohë kur relativizmi e të ashtuquajturat “modele të reja të familjes” e kanë zbehur
rolin e gjyshërve. Edhe në trevat shqiptare, pavarësisht se vlerat e familjes
janë akoma të forta, shumë të moshuar mbeten vetëm për shkak të emigrimit të bijve,
duke përballuar një jetë, e cila nuk është e lehtë as për të rinjtë. Duke u kujtuar
të gjithëve, pra edhe emigrantëve, se duhet të bëjnë ç’është e mundur të kujdesen
për ata, që “u kanë bërë kokën”, siç thonë shqiptarët, ka edhe një aspekt tjetër,
që vihet në dukje nga festa e shën Joakinit e të shën Anës. Ja ç’thotë Papa Benedikti
XVI për këtë: “Ky kremtim na bën të mendojmë për temën e edukimit, që ka një
vend shumë të rëndësishëm në baritorinë e Kishës. Në veçanti, na fton të lutemi për
gjyshërit, të cilët janë depozituesit e shpesh edhe dëshmitarët e vlerave themelore
të jetës në familje. Detyra edukative e gjyshërve është gjithmonë shumë e rëndësishme
dhe, bëhet edhe më tepër, kur, për arsye të ndryshme, prindërit nuk kanë mundësi t’u
qëndrojnë pranë fëmijëve, ndërsa rriten”. (Lutja e Engjëllit të Tënzot, 26 korrik
2009)