Liban. Imzot Matar: “Mesazhi i Papës vlen për mbarë Lindjen e Mesme”.
Pranë selisë së Qendrës katolike për informacion të Beirutit, dje u mbajt një konferencë
shtypi, gjatë së cilës u shpjegua shtegtimi apostolik i Benediktit XVI në Liban (14-16
shtator). Së bashku me nuncin apostolik, imzot Gabriel Caccia dhe kryeipeshkvin e
Beirutit, imzot Paul Matar, sipas njoftimit të Franciscan Media Center, rimarrë nga
agjencia Sir, ishin të pranishëm edhe përfaqësuesit e Komitetit, që merret me përgatitjen
e vizitës papnore. Libani është pothuajse gati për ta pritur Benediktin XVI, tha atë
Marwan Tabet, i Komitetit për gatitjen e vizitës. Puna nisi që në mars, me takime
të shpeshta ndërmjet autoriteteve vatikanase dhe përfaqësuesve të pallatit presidencial
në Liban. Atë Tablet deklaroi, më pas, se vizita do të financohet pjesërisht nga qeveria
libaneze e pjesërisht nga kisha vendase dhe disa donatorë. Një vëmendje e posaçme
po i kushtohet mediave libaneze dhe përgatitjes së tyre për ngjarjen e madhe, falë
edhe kanalit . Atë Abu Kassem, drejtor i Qendrës katolike për informacionin, pohon
se po përgatitet edhe një sallë shtypi për gazetarët, për të 66-tët, që do të arrijnë
së bashku me Atin e Shenjtë, e edhe për të tjerët, nga Libani e vende të ndryshme
të botës, gjithnjë të pranishëm në shtegtimet ppanore. Është rast i madh për ne,
pritja e Papës, pohon atë Kassem, shenjë paqeje e pajtimi. Shpresojmë të sjellë paqen
në Liban e në mbarë Lindjen e Mesme. Edhe ipeshkvi i Beirutit, imzot Matar, shprehu
bindjen se kjo vizitë do të jetë mesazh drejtuar, përmes Libanit, mbarë Lindjes së
Mesme. Presim, prandaj, Papën e fjalën e tij për të gjithë zonën e Lindjes së Mesme,
theksoi imzot Matar.