எயிட்ஸ் நோய் பரவுவதைக் கட்டுப்படுத்தும் முயற்சிகள் வெற்றிபெற்று வருகின்றன
ஜூலை,23,2012. எயிட்ஸ் நோய்க்கெதிரான நடவடிக்கைகள் ஓரளவு வெற்றிப்பாதையை நோக்கி நடைபோட்டுவரும்
இவ்வேளையில் எக்காரணம் கொண்டும் உலக நாடுகள் தங்கள் முயற்சியிலிருந்து பின்வாங்கக்கூடாது
என அழைப்பு விடுத்துள்ளனர் அமெரிக்க ஐக்கிய நாட்டில் எயிட்ஸ் குறித்த கருத்தரங்கில் பங்குபெறும்
வல்லுனர்கள். எய்ட்ஸ் நோயாளிகளைக் காப்பாற்ற வல்ல மருந்துகள் இன்னும் முழுமையாகக்
கண்டுபிடிக்கப்படவில்லையெனினும், இந்நோய் பரவுவதைக் கட்டுப்படுத்தும் முயற்சிகள் வெற்றிபெற்று
வருவதாக உரைத்த அறிவியலாளர்கள், இந்நோய்க்கு எதிரானப் போராட்டங்கள் எப்படியும் முன்னோக்கி
எடுத்துச் செல்லப்படவேண்டும் எனவும் உரைத்தனர். புள்ளிவிவரக் கணக்குகளின்படி, இன்று
உலகில் 3கோடியே 42 இலட்சம் பேர் HIV நோய்க் கிருமிகளுடன் வாழ்கின்றனர். ஒவ்வோர் ஆண்டும்
25 இலட்சம்பேர் HIV நோய்க் கிருமிகளை புதிதாகப் பெறுகின்றனர். கடந்த ஆண்டில் மட்டும்
ஏழை நாடுகளில் எயிட்ஸ் நோய்க்கெதிரான நடவடிக்கைகளுக்கென 1680 கோடி டாலர் செலவிடப்பட்டுள்ளது.