Siria në flakë. Dëshmia e murgeshes saleziane nga Damasku
Bashkësia ndërkombëtare, e paaftë të zgjidhë krizën në Siri, ku vazhdojnë luftimet.
Vendi tashmë është në flakë prej ditësh e viktimat civile janë shtuar, duke arritur
pikun më të lartë nga fillimi i konfliktit, pikërisht javën e kaluar, ditën e enjte,
në Damask. Ndërkaq, Rusia dhe Kina vunë veton kundër një rezolute të OKB-së, që sipas
tyre, do t’i hapte rrugën ndërhyrjes nga jashtë. Vetëm ditët e fundit, nga Siria janë
larguar për në Liban, mëse 30 mijë vetë. E pikërisht prej njërës nga lagjet në flakë
të Damaskut, arrin dëshmia e motër Marçelës, rregulltare e salezianeve të Zojës
Ndihmëtare, që drejtojnë të vetmin spital privat të qytetit e vijojnë, pavarësisht
nga krismat e flakët, apostullimin e shërbimin: Përgjigje: - Jetojmë
në një situatë shpërthyese: nganjëherë arrijnë lajme, që na tmerrojnë, herë tjetër
thonë ‘Jo, jo! Mos u trembni, e keqja e madhe kaloi”. Jeta jonë është plot me krisma
bombash, që dje e sot janë bërë më të shpeshta. Morëm edhe lajmin se ambasada italiane
ka dhënë urdhër për largimin e gjithë bashkatdhetarëve: nuk e di sa është e vërtetë.
Sidoqoftë, këtij urdhëri mund t’i binden të gjithë, veç rregulltareve. Ne përgatitemi
edhe për martirizim, ndonëse bashkëjetesa ndërmjet nesh e tyre ka qenë gjithnjë e
mrekullueshme. Kanë pasur për ne nderim të madh. Salezianët, përkrah nesh, organizojnë
oratorin me fëmijët ortodoksë, irakianë, me refugjatët, ditë për ditë. Jeta është
bërë tepër e shtrenjtë e njerëzit e varfër rrezikohen edhe për ato dy kacidhe të shkreta,
që u duhen për të mbajtur frymën gjallë.