Прэфект Кангрэгацыі
па справах Усходніх Касцёлаў, кардынал Леанарда Сандры, 18 ліпеня завяршыў свой візіт
у Грузію і Арменію. Нагодай для наведання першай з краін стала 20-годдзе ўстанаўлення
дыпламатычных адносін Апостальскай Сталіцы з Грузіяй. Апрача афіцыйных святкаванняў
і сустрэч, ватыканскі іерарх сустрэўся ў Тбілісі з грузінскай моладдзю. Візіт у Арменію
пачаўся 15 ліпеня св. Імшой на армянскай мове ў новапабудаваным касцёле горада Ташыр.
Кульмінацыйным момантам візіту кардынала Сандры была сустрэча з Каталікосам усіх армян
Гарэгінам ІІ. Падчас спаткання кіраўнік Армянскай Апостальскай Царквы назваў “цёплымі,
гістарычныя адносіны паміж абдвума Касцёламі”, падкрэсліўшы канструктыўнае супрацоўніцтва
ў сацыяльнай і адукацыйнай сферах. Кардынал Сандры выказаў надзею, што адносіны паміж
двума Цэрквамі будуць яшчэ больш умацоўвацца.
Акрамя таго, прэфект Кангрэгацыі
па справах Усходніх Касцёлаў, сустрэўся з Прэзідэнтам Рэспублікі Арменія Сержам Саргсянам
і міністрам замежных спраў Эдвардам Налбандянам. У апошні дзень свайго візіту кардынал
Сандры наведаў бальніцу “Redemptoris Mater”, якая была пабудавана па ініцыятыве бл.
Яна Паўла ІІ як дар для ахвяр землятрусу, які абрынуўся на Арменію ў 1988 г.