“Lum ata, që punojnë për paqen” është tema e Ditës Botërore të Paqes 2013.
Për kremtimin e Ditës së 46-të Botërore të Paqes, që do të kremtohet më 1 janar 2013,
Ati i Shenjtë zgjodhi temën: “Lum ata, që punojnë për paqen!”. Mesazhi vjetor
i Papës, në rrethanat e ndërlikuara aktuale, ka për qëllim t’i inkurajojë të gjithë
njerëzit vullnetmirë për ta ndjerë thellë përgjegjësinë lidhur me sigurimin e paqes. Në
Mesazh shpjegohet në mënyrë të gjithanshme koncepti i paqes, duke u nisur nga qenia
njerëzore: flitet për paqen, që njeriu e ka në shpirt, e për atë që buron ose që humbet
për shkak të ndikimit të mjedisit rrethues. Vihet, pastaj, theksi, mbi çështjen antropologjike,
mbi natyrën dhe ndikimin e nihilizmit si dhe mbi të drejtat themelore, duke vënë në
radhë të parë lirinë e ndërgjegjes, lirinë e fjalës, lirinë fetare. Mesazhi ofron
edhe një reflektim etik mbi disa masa, që po merren në botë për të frenuar krizën
ekonomike e financiare, thekson emergjencën edukative, vë në dukje krizën e institucioneve
e të politikës e cila, në shumë raste, është edhe krizë shqetësuese e demokracisë.
Mesazhi lidhet me 50 vjetorin e Koncilit II të Vatikanit si dhe me enciklikën
e Papës Gjoni XXIII, ‘Pacem in terris’, që vë në plan të parë dinjitetin e
njeriut dhe lirinë e tij, për krijimin e një mjedisi në shërbim të çdo njeriu, pa
asnjë dallim, me synimin për t’i shërbyer së mirës së përbashkët, mbi të cilën bazohet
drejtësia edhe paqja e vërtetë. “Lum ata që punojnë për paqen” do të jetë Mesazhi
VIII i Papës Benedikti XVI për kremtimin e Ditës Botërore të Paqes 2013. Në vijim,
po kujtojmë titujt e mesazheve të mëparshme: “Nuk mund të ketë paqe, pa të vërtetën”
(2006); “Njeriu është zemra e paqes” (2007); “Familja njerëzore, bashkësi
e paqes” (2008); “Të luftohet kundër varfërisë, të ndërtohet paqja”(2009);
“Në se dëshiron të kultivosh paqen, mbroje gjithësinë”(2010); “Liria fetare,
rrugë për paqen”(2011) dhe “Të edukohen të rinjtë me frymën e drejtësisë e
të paqes” (2012).