“Fundi dhe fillimi”: shkrimtari George Weigel përfundon biografinë monumentale të
Papës Vojtila.
E kishte këputur rrëfimin për jetën e Papës Vojtila, në prag të Jubileut të Madh të
dymijëshit. Tani, shkrimtari amerikan George Weigel, e përfundoi veprën e nisur në
vëllimin “Dëshmitar i shpresës”, me një vëllim tjetër voluminoz, titulluar “Fundi
e fillimi”, botuar nga Cantagalli. E ndoqëm paraqitjen e librit: Titullin e vëllimit
të parë ia pati ‘dhuruar’ vetë Papa kur, më 1995, nga tribuna e OKB-së në New York,
e pati quajtur veten “dëshmitar i shpresës”. Tri fjalë të përsosura, tejet të përshtatshme
për të qëndruar mbi kapakun e vëllimit monumental që George Weigel, teolog e shkrimtar
amerikan, i pati kushtuar papnisë së Gjon Palit II, duke i treguar ngjarjet e jetës
së Papës polak deri në vitin 1999. Pasi realizoi 1300 faqe, i shton tani edhe
600 të tjera, për të përfunduar një tregim epokal për Kishën dhe botën bashkëkohore.
“Fundi e fillimi”, është titulli thellësisht simbolik i librit të ri, që u paraqit
pak ditë më parë në Romë. Me të Weigel rilidh fillin e luftës së Karol Vojtilës kundër
komunizmit, përshkruar në pjesën I, me atë të pjesës II, në të cilën e zgjeron më
tej këtë betejë me ndikime botërore, falë studimit të dokumenteve, të cilat asokohe
ishin akoma sekrete: “Mendoj se vitet e kaluara nga 1999 deri më sot,
pohojnë rolin qëndror, që luajti Gjon Pali II në shembjen e komunizmit evropian. Sigurisht
nuk ishte figura e vetme në këtë dramë por, pa të, ajo që sot e quajmë “1989”-ta,
nuk do të kishte ndodhur, atëhere kur ndodhi e as ashtu si ndodhi”. Libri
i Weigel hyn, pastaj, në trojet deri tani të pazbuluara të viteve të fundit të jetës
së Papës Vojtila, vitet entuziaste të mijëvjeçarit të tretë, i cili lind me Jubileun
e perëndon me perëndimin e ngadalshëm fizik që, përmes një kontrasti mahnitës, nuk
e errëson, përkundrazi, e ndriçon edhe më shumë madhështinë e shpirtit të Papës. Madhështi
e njeriut, që e ndihmoi mbarë botën ta kapërcente pragun e shpresës: “Do
të thosha se Gjon Pali II ishte dëshmitari më i madh i krishterë i gjysmës së dytë
të shekullit XX, që e bëri interesant e bindës krishterimin në atë nivel, në të cilin
nuk kishte arritur askush tjetër - katolik, protestant ose ortodoks, në një epokë
në të cilën bota mendonte se tashmë e kishte lënë pas shpine krishterimin. E, gjëja
e dytë, sipas meje, është se flitet për një njeri me perspektivë të pashoqe lidhur
me sfidat e lirisë, që kanë të bëjnë me shekullin XXI. Në të vërtetë shumë nga problemet,
që po jeton në këtë çast Evropa, me të cilat ballafaqohet sot, u parashikuan në një
farë mënyre nga Gjon Pali II qysh në vitin 2003, e edhe më parë akoma, në Enciklikën
‘Centesimus Annus’ të 1991-it”.
Kardinali Camillo Ruini, për shumë
vjet tejet pranë Papës Gjon Pali II në dioqezën e Romës, shpjegon si del figura e
Papës në faqet e vëllimit të ri të Weigel:“Del me shumanshmërinë e vet,
me kompleksitetin e vet, por edhe me forcën e, në fund të fundit, edhe me thjeshtësinë...
E kjo, sepse Gjon Pali II ishte njeri tepër i thjeshtë, e edhe tepër i fortë. Forcë
natyrore, forcë njerëzore e, natyrisht, forcë feje, forcë që buron nga lidhja me Zotin.
Të dyja këto gjëra shkrihen në një të vetme”.