Լոնտոնի «Թապէրնաքլ» համալիրի դահլիճը ծայրէ ծայր լեցուցած էր արուեստասէրներու հետաքրքիր
բազմութիւն մը, որ անհամբերութեամբ կը սպասէր Արմէն Տիգրանեանի «Անուշ»ին՝ «Լոնտոնի հայկական
օփերա»յին կողմէ առաջին ներկայացման: Այս մասին կը յայտնէ Ֆրանսայի «Նոր Յառաջ»ը։ Բոլոր
հանդիսականները անխտիր՝ հայ թէ ոչ-հայ, հրապուրուեցան ներկայացման արհեստավարժ մակարդակով:
Արդարեւ, փորձառուներու, երիտասարդ տաղանդներու եւ տեղական համայնքէն սիրողներու համադրումը
կատարուած էր լաւագոյն ձեւով: Հինգ արարներով ներկայացուած օփերան հմայեց՝ երգիչներու
գեղեցիկ ձայներով, երգչախումբով, ընկերակցող նուագախումբով, փոքրիկ պարողներով, զգեստաւորումով: Այս
առթիւ հրատարակուած յատուկ յայտագրին մէջ տեղ գտած են «Լոնտոնի հայկական օփերա»ի նախագահ
Դաւիթ Ստեփանի եւ գեղարուեստական ղեկավար՝ Արիս Նատիրեանի խօսքերը, դերակատարներու կենսագրականները: Իր
խօսքին մէջ Նատիրեան կ՚ըսէ, ի միջի այլոց. «Այս տարին յատուկ կարեւորութիւն ունի մեզի
համար. կը նշենք այս օփերային հարիւրամեակը: Անուշի դերը ստանձնած էր Թերեզա Գէորգեան,
Սարոյի դերը՝ Վահէ Պեկոյեան: Արիս Նատիրեան կ՚ապահովէր Մոսիի դերը, իսկ Անուշի մօր դերին
մէջ կը փայլէր Անահիտ Եղոյեան: Նուագախումբը կը ղեկավարէր Լեւոն Բարիքեան: