Харватыя: біскупы крытыкуюць закон аб штучным апладненні
“Глыбока амаральным”
і “нечалавечым”, пагражаючым фундаментальным каштоўнасцям жыцця, сям’і і сужэнства,
назвалі біскупы Харватыі рашэнне парламента краіны аб зменах у заканадаўстве адносна
штучнага апладнення. Новы закон, прыняты большасцю дэпутатаў, прадугледжвае замарозку
гаметаў і эмбрыёнаў. Акрамя таго, доступ да штучнага апладнення цяпер гарантуецца
як для жанатых пар, якія не могуць мець дзяцей, так і для нежанатых, а таксама адзінокіх
жанчын.
Закон, які дзенічаў у Харватыі да гэтага часу, забараняў замарозку
эмбрыёнаў. Акрамя таго, ён абавязваў бацькоў інфармаваць сваіх дзяцей, па дасягненні
18-гадовага ўзросту, аб іх біялагічным паходжанні. Харвацкія біскупы лічыць, што гэта
рашэнне парламентарыяў мае на мэце ўтрымаць электарат. “Ніякая перамога на выбарах
не дае неабмежаванай улады над жыццём і смерцю, і не дазваляе ставіць у небяспеку
фундаментальныя каштоўнасці, такія як сужэнства і сям’я”, - напісалі каталіцкія іерархі.