Кс. Ламбардзі: музыка можа стаць пасланнем каштоўнасцяў для чалавецтва
Кс. Фэдэрыка Ламбардзі
лічыць, што “мастацтва, акрамя таго, што прыносіць эстэтычнае задавальненне, можа
стаць моцным пасланнем жыццёвых каштоўнасцяў для чалавецтва”. У сваёй аўтарскай рубрыцы
на Ватыканскім радыё, ён узгадаў аб “незвычайным канцэрце” араба-ізраільскага аркестра,
які адбыўся на днях у Кастэль-Гандольфа ў прысутнасці Папы. Кс. Ламбардзі назваў геніяльнай
ідэю італьянскага прэзідэнта Напалетана “даць магчымасць Папе сустрэцца са знакамітым
аркестрам маладых музыкантаў, якія паходзяць з Ізраіля, Палестыны і іншых арабскіх
краін, заснаваным вялікім дырыжорам, яўрэем па нацыянальнасці, Даніэлем Берэнбоймам
і палестынскім літаратарам Эдвардам Саідам”. Ён нагадаў словы Святога Айца аб тым,
што две сімфоніі Бетховена, пятая і шостая, якія гучалі падчас канцэрта, выражаюць
два фундаментальных аспекты жыцця: драму і мір.
“Сапраўды, мастацтва, акрамя
таго, што прыносіць эстэтычнае задавальненне, можа стаць моцным пасланнем жыццёвых
каштоўнасцяў для чалавецтва. Можа злучаць разам, дзякуючы музыцы, таленты з розных
народаў, культур і рэлігій, каб яны станавіліся пасламі міра! Яўрэі, мусульмане, хрысціяне,
якія ствараюць згоду не толькі паміж сваімі інструментамі для гармоніш гукаў, але
таксама і паміж сваімі душамі, для гармоніі жыцця і супольнага будавання!”, - сказаў
езуіт.
Кс. Ламбардзі нагадаў, што Папа рыхтуецца да вераснёўскага падарожжа
ў Ліван, каб прынесці вернікам і народам Блізкага Усходу плёны Сінода Біскупаў, які
адбыўся ў Ватыкане два гады таму і быў прысвечаны тэматыцы гэтага рэгіёну. Ён падкрэсліў,
што з таго часу на Блізкім Усходзе адбыліся шматлікія перамены: “у арабскіх краінах
пачалося глыбокае браджэнне, Сірыя – разарвана насіллем, Святая Зямля працягвае чакаць
вырашэння канфліктаў і бясконцых сутыкненняў”. “Але, як казаў Папа, неабходна працягваць
працаваць дзеля міра, “адкідаючы ў бок насілле і зброю, спрыяючы асабістаму і супольнаму
навяртанню, праз дыялог і цярплівы пошук магчымых рашэнняў”. Канцэрт у кастэль Гандольфа
з’яўляецца, няхай і маленькім, але знакам надзеі і вялікай духоўнай сілы, а таксама
цудоўным пажаданнем для будучага падарожжа Папы”, - лічыць кс. Ламбардзі.