Папа з “Колам вучняў Ратцынгера” будуць дыскутаваць аб экуменізме
Бэнэдыкт XVI будзе
дыскутаваць са сваімі былымі студэнтамі ў пачатку верасня аб сучасных тэалагічных
пытаннях. “Кола вучняў Ратцынгера” (Ratzinger-Schülerkreis) засяродзіцца на сітуацыі
ў экуменічным руху, у прыватнасці, адносінах з англіканамі і лютэранамі, паінфармавала
швейцарскае каталіцкае агенцтва “KIPA/APIC” 13 ліпеня. 30 членаў кола студэнтаў, пераважна
нямецкамоўных тэолагаў, збяруцца 1 і 2 верасня ў папскай летняй рэзідэнцыі ў Кастэль
Гандольфа.
Сустрэчы праводзяцца рэгулярна з 1970-х гадоў, калі цяперашні Папа
быў прафесарам тэалогіі ў Рэгенсбургскім універсітэце. Яны працягвалі адбывацца нават
тады, калі Ратцынгер сышоў з універсітэту і спачатку стаў у 1976 г. арцыбіскупам Мюнхенскім,
а затым у 1982 г. прэфектам Кангрэгацыі Веравучэння. Нават пасля таго як ён быў абраны
на Пасад св. Пятра, “Кола вучняў Ратцынгера” працягвае свае штогадовыя сустрэчы.