Чаму Юрый Гагарын
не ўбачыў Бога падчас свайго падарожжа ў космас і ці можна верыць у міласэрнага Створцу
пасля злачынстваў у Аўшвіцы? На гэтыя пытанні адказвае ў сваёй новай кнізе італьянскі
кардынал Джакама Біфі. Звяртаючыся да “сваіх сяброў атэістаў”, былы арцыбіскуп Балоніі,
нагадвае, што першы савецкі касманаўт пасля свайго вяртання з космасу расказаў, што
“не знайшоў там ніякіх слядоў прысутнасці Бога”. “Я думаю, што гэта добра! - піша
кардынал Біффі, - Было б горш калі б ён знайшоў іх. (...) Як можна сур’ёзна ўспрымаць
гіпотэзу аб тым, што да Бога можна дабрацца не дзякуючы ўнутранаму навяртанню і акту
веры, як вучыць пасланне Хрыста, але з дапамогай спецыяльна прызначанай для гэтага
ракеты?”, - пытаецца іерарх.
Кардынал адказвае таксама на распаўсюджанае
меркаванне аб тым, што пасля злачынстваў Аўшвіца немагчыма ўжо верыць у Бога. Іерарх
падкрэслівае, што калі б нават Бога не было, злачынствы, якія здзяйсняліся ў канцлагеры,
усё роўна адбыліся б. “Калі б Бог не існаваў, зло свету накрыла б нас усім сваім цяжарам
цемры. Але калі Бог ёсць, нягледзячы на ўсе катаванні і зверствы, будзе апошняя і
рашаючая прастора, над якой будзе панаваць найвышэйшая справядлівасць і трасцэндэнтная
міласэрнасць”, - адзначае іерарх. “Калі апошняе слова аб нас будзе прамоўлена Боскасцю,
мы здолеем працягваць спадзявацца, што аднойчы справядлівасць будзе адноўлена, а абсурднасць
будзе пераможана”. “Таму, пасля Аўшвіца немагчыма не верыць у Бога”, - заключае кардынал
Біфі.