Si sot, një vit më parë, më 12 korrik 2011 ndërroi jetë dom Simon Jubani, prifti që
sfidoi regjimin ateist të komunizmit dhe me kremtim të Meshës së Shenjtë ndër varreza
të Rrëmajit të Shkdorës, më 4 nëntor 1990, sanksionoi fundin e diktaturës komuniste
në Shqipëri. Prifti shkodran dom Simon Jubani, qe ndërgjegjja e Kishës dhe e shoqërisë
shqiptare pas rënies së regjimit komunist: Është një nga njerëzit e meshtarët katolikë
shqiptarë që ka vuajtur tërë jetën në burgjet komuniste duke qëndruar besnikërisht
e heroikisht torturave të tmerrshme, të ushtruara nga regjimi komunist ndaj të gjithë
atyre njerëzve e qytetarëve që nuk mohonin vlerat shpirtërore, kulturore e kombëtare
as para dënimeve, persekutimeve e vrasjeve. Kështu mund të pohojmë se pikërisht kremtimi
i Meshës së parë, që kur regjimi komunist e ndaloi lirinë fetare dhe mbylli Tempujt
e Zotit në Shqipëri, kremtuar nga dom Simon Jubani më 4 nëntor 1990 në varreza të
Rrmajit, qe shprehje e asaj fuqie shpirtëror hyjnore e njerëzore që diktatura komuniste
nuk arriti kurrë ta çrrënjoste nga zemra e nga shpirti i shqiptarëve besimtarë. Dom
Simon Jubani u bë kështu nismëtar i rihapjes së Kishave dhe i Xhamive në Shqipëri,
kur regjimi komunist ende nuk ishte rrëzuar. Kleri e Kisha Katolike edhe një herë
u bënë shkëndijë që ndezi e i dha hov fitores së lirisë e fuqi e rivendosjes së demokracisë
në Shqipëri. Sot pra kujtojmë ditën e kalimit në amshim të dom Simon Jubanit, njërit
ndër protagonistet e pranverës së lirisë e të demokracisë së Shqipërisë, pas dimrit
të egër të diktaturës komuniste.
Figurë poliedrike, dom Simoni qe i zgjuar,
i qëndrueshëm, vëzhgues i vëmendshëm i realitetit shqiptare: atij kishtar, shoqëror,
kulturor e politik. Me temperament të zjarrtë, qe përherë i gatshëm për këdo, hokatar,
por edhe mbrojtës i patrembur i të vërtetave të fesë dhe i vlerave ungjillore e atyre
kombëtare. Mbylli sytë duke besuar thellësisht se vetëm tek Zoti do të ketë drejtësi
e shpërblim. · Dom Simon Jubani lindi në Shkodër, me 8 mars 1927 nga prindërit
Zef e Çile që kishin një familje katolike të devotshme dhe i falen Kishës e Atdheut
dy meshtar: një martir intelektual, dom Lazër Jubani, helmuar me arsenik nga policia
sekrete komuniste me 1982, dhe të guximshmin dom Simon Jubanin. Në moshën 16-vjeçare,
i thirrur prej Zotit, hyri në Shkollën Apostolike (Kolegjin Saverian) në Shkodër për
t'u bë rregulltar jezuit. Në mars të vitit 1946, kur u shkatërruan të gjitha shkollat
katolike tradicionale, i'u deshtë të hynte në Gjimnazin e Shtetit. Në vijim u transferua
në Tiranë, ku kryen një kurs radiografie. Punon për pak kohë në Spitalin Ushtarak
të kryeqytetit. Kthehet rishtas në Shkodër dhe ndërkohë punon në radiologjinë e Sanatoriumit
të Shkodrës, ndërsa aktivizohej në sport: atletiken e lehtë dhe futbollin. Angazhohet
në ekipin e Vllaznisë. Më 4 maj 1958 shugurohet meshtar nga Imzot Ernest Çoba dhe
dërgohet të shërbej në Abacinë e Mirditës. Arrestohet në vitin 1963 dhe vuan 26 vite
burg. Gjithnjë militant aktiv, ballë për ballë katilëve e spiunëve komunistë të burgut
të Burrelit, u lirua më 13 prill 1989 bashke me klerikë të tjerë. Dom Simon Jubani
është pikërisht ai meshtar që më 4 e 11 nëntor 1990 kremtoi Meshën e parë publike
tek Varrezat e Rrmalit në Shkodër duke u bërë nismëtari i rihapjes së Kishës dhe Tempujve
të Zotit në Shqipëri. Për këtë kontribut të çmueshëm mbarëkombëtar, që Zoti ia besoi,
Universiteti amerikan i San Franciskos në Kaliforni në vitin 1991 i akordoi diplomën
"Doctor Honoris Causa" në shkenca humane me motivacionin: "Protagonist i një epoke
të re në Shqipni". Pas komunizmit për disa vite shërben përsëri në malet e Mirditës
dhe dekadën e fundit me përkushtim dhe besnikëri shërbeu në përvujtërinë e rrëfystores
së Katedrales së Shkodrës.