Ватыканскі кардынал аб “празмернай” канцэлебрацыі св. Імшы
Кардынал Рэйманд Лео
Бёрк, Прэфект Вярхоўнага Трыбуналу Апостальскай сігнатуры, лічыць, што “празмерная”
канцэлебрацыя Эўхарыстыі – калі св. Імша адпраўляецца групай святароў – можа прывесці
да змяншэння ўнікальнасці ролі апошніх у літургіі. “Калі гэта паўтараецца занадта
часта, у святары можа развіцца адчуванне, што ён толькі адзін з удзельнікаў Эўхарыстыі,
хоць на самой справе – ён святар, які складае ахвяру св. Імшы”, - патлумачыў кардынал
9 ліпеня на канферэнцыі ў ірландскім горадзе Корк.
Кіраўнік вышэйшай судовай
інстанцыі Святога Пасаду лічыць, што канцэлебрацыя характэрна для ўрачыстай літургіі
з удзелам біскупа або яго прадстаўніка. Калі гэта адбываецца ў супольнасці саміх святароў
– гэта спрэчнае з лацінскай літургічнай традыцыяй, заявіў ён.
Кардынал Бёрк
звярнуў таксама ўвагу на так званую “імправізацыю” падчас св. Імшы, калі святар дадае
свае ўласныя словы ва ўстаноўленыя і зацверджаныя літургічныя тэксты. Такім чынам,
апошні, на думку іерарха, робіць “галоўным героем літургіі не Хрыста”, а сябе, хоць,
насамрэч, ён толькі “слуга абраду”. “Гэта абсалютна няправільнае мысленне, калі святар
думае з пункту гледжання: “як я магу зрабіць усё больш цікавым?” ці “як я магу зрабіць
гэта лепш?”, - лічыць кардынал Бёрк. Ён нагадаў, што гэта забараняе Кодэкс кананічнага
права. “Думаць, што я магу палепшыць літургію, якая перадавалася ў Касцёле на працягу
стагоддзяў – гэта абсурд”, - заявіў кардынал Бёрк.