Кусташ Святой Зямлі: візіт Папы у Ліван умацуе ролю хрысціян
Кусташ Святой Зямлі,
айцец Пьербаціста Піцабала лічыць, што візіт Бэнэдыкта ХVI у Ліван у верасні гэтага
года, умацуе ролю хрысціян у гэтай краіне і паспрыяе міру ў рэгіёне. Францішканін
заявіў, што візіту Папы чакае ўвесь Блізкі Усход. Мы ўжо атрымалі шмат заяў ад жадаючых
паўдзельнічаць у сустрэчы з Папам, паінфармаваў ён. “Мы ведаем, што з-за палітычнай
сітуацыі не лёгка будзе атрымаць візу”, - сказаў айцец Піцабала. Ён адзначыў, што
сустрэча Святога Айца з кіраўнікамі мусульман мае вялікае значэнне для дыялогу паміж
хрысціянамі і мусульманамі на Блізкім Усходзе.
“Вядома, што адной з важных
тэм Сінода для Блізкага Усходу былі менавіта адносіны з ісламам. Касцёлам на Блізкім
Усходзе ёсць што сказаць з гэтай нагоды. Іх будучыня залежыць таксама ад здольнасці
мець ясныя і мірныя адносіны з блізкаўсходнім ісламам, які перажывае вялікія змены
і пераўтварэнні. Таму, гэта будзе адна з найважнейшых сустрэч Папы, які дасць нам
таксама самыя актуальныя ўказанні на будучыню”, - сказаў законнік.
Айцец Піцабала
адзначыў, што візіт Святога Айца ўмацуе прысутнасць хрысціян на Блізкім Усходзе.
“Арабская вясна”, ці тое, што ад яе засталося, цалкам змяніла іх структуры, адносіны
і дынаміку дзейнасці”, - сказаў Кусташ Святой Зямлі і дадаў, што Сінод па Блізкім
Усходзе, у пэўным сэнсе прадбачыў гэта і вызначыў іх у сваім дакуменце. Цяпер вельмі
важна перайсці да этапу будаўніцтва: Блізкі Усход змяняецца, змяняецца таксама іслам,
які з’яўляецца асноўным веравызнаннем на Блізкім Усходзе, таксама і хрысціяне змяняюцца
і хочуць быць галоўнымі героямі гэтых зменаў, лічыць законнік.