Маскоўскі Патрыярхат павіншаваў новага прэфекта Кангрэгацыі Веравучэння
У Маскоўскім Патрыярхаце
павіншавалі Герхарда Людвіга Мюлера з прызначэннем на пасаду прэфекта Кангрэгацыі
Веравучэння і наданнем тытулу арцыбіскупа. “Прызначэнне Вас кіраўніком так важнай
кангрэгацыі Святога Пасаду мне ўяўляецца знакам відавочнага прызнання Вашых шматлікіх
тэалагічных прац і плённай дзейнасці ў акадэмічнай сферы”, - гаворыцца ў тэлеграме
кіраўніка Сінадальнага Аддзела знешніх царкоўных сувязяў Мітрапаліта Валакаламскага
Іларыёна.
Як нагадаў іерарх, у свой час арцыбіскуп Мюлер стаў адным з самых
маладых прафесараў Мюнхенскага ўніверсітэта, у якім на працягу 25 гадоў выкладаў на
кафедры дагматычнай тэалогіі. Многія гады ён з’яўляўся членам камісіі па веравызнанні
біскупскай канферэнцыі Германіі і Міжнароднай тэалагічнай камісіі.
“Нам памятны
Ваш уклад у адраджэнне сумеснай камісіі па тэалагічным дыялогу паміж Маскоўскім Патрыярхатам
і Канферэнцыяй Біскупаў Германіі, сустаршынёй якой Вы з’яўляліся. Шчыра спадзяюся,
што плады гэтага дыялогу не страцяць свайго значэння і ў Вашай новай дзейнасці на
пасадзе прэфекта Кангрэгацыі Веравучэння", - напісаў Мітрапаліт Іларыён.