У каталіцкай Аўстрыі паразмаўляюць пра хрысціян у меншасці
У бэнэдыктынскім кляштары
Ламбах у Верхняй Аўстрыі 20-21 ліпеня пройдзе міжнародны сімпозіум “Хрысціяне ў меншасці.
Імпульсы для місіянерскага жыцця”, паведамляе сайт кляштару. Місіянеры з розных краін
і прадстаўнікі праваабарончых арганізацый выступяць з дакладамі, у якіх распавядуць
аб становішчы хрысціян у краінах і рэгіёнах, дзе яны складаюць меншасць.Вопыт жыцця
хрысціянскай супольнасці ў Індыі прадставіць арцыбіскуп Уільям д’Суза, які ўзначальвае
дыяцэзію Патна ў штаце Віхар, дзе з 25 млн. жыхароў усяго 58 тыс. з’яўляюцца католікамі.
Яго даклад прысвечаны складаным працэсам інтэграцыі меншасцяў у індыйскі соцыум.
Прафесар
Марыя Відль прадставіць сітуацыю ва Усходняй Германіі. З 2003 г. яна займаецца даследаваннямі
ў Эрфурте ў Цюрынгіі. Дзве трэція насельніцтва ў гэтым рэгіёне не вызнаюць ніякую
рэлігію. Сярод удзельнікаў канферэнцыі заяўлены таксама спецыяліст па камунікацыях
з копцкай супольнасці Каіра, віцэ-старшыня Асацыяцыі Верхняга Егіпта па пытаннях адукацыі
і развіцця Нагва Фараг. Яго даклад прысвечаны праблемам, якія стаяць перад егіпецкімі
хрысціянамі пасля “арабскай вясны”.
Канферэнцыя арганізавана так званым “Сімпозіумам
Паўсюднага Касцёла” - асацыяцыяй жаночых і мужчынскіх манаскіх супольнасцяў Аўстрыі,
у якую ўваходзяць таксама дабрачынныя арганізацыі і шэраг іншых структур.