Бэнэдыкт XVI 3 ліпеня
пераселіцца ў сваю летнюю рэзідэнцыю ў Кастэль Гандольфа. Увечары на верталёце Папа
вылеціць з ватыканскага геліпорта ў бок рэзідэнцыі над Альбанскім возерам. У ліпені
адменены ўсе аўдыенцыі і публічныя мерапрыемствы з удзелам Святога Айца, у тым ліку
агульныя аўдыенцыі па серадах. З 1 жніўня яны адновяцца і будуць праходзіць у Кастэль
Гандольфа. Па нядзелях і святах Пантыфік узначаліць таксама малітву “Анёл Панскі”.
Дата вяртання Папы ў Рым, пакуль не вядома. Верагодна, пасля свайго візіту ў Ліван,
14-16 верасня, Бэнэдыкт XVI вернецца яшчэ на некалькі дзён у летнюю рэзідэнцыю. Летам
у Кастэль Гандольфа пройдуць два канцэрты ў гонар Папы. 11 ліпеня Даніэль Барэнбойм
прадставіць Святому Айцу канцэрт у выкананні ізраільска-арабскага моладзевага аркестра,
а 3 жніўня да Папы прыедуць музычныя і танцавальныя калектывы з Мюнхенскай дыяцэзіі.
15 ліпеня адбудзецца кароткі візіт Бэнэдыкта XVI у італьянскі горад Фраскаці, а 15
жніўня, па традыцыі, Папа наведае касцёл св. Тамаша з Віланова побач са сваёй рэзідэнцыяй.
Папская
летняя рэзідэнцыя знаходзіцца прыкладна ў 25 км на паўднёвы ўсход ад Рыма, у горадзе
Кастэль Гандольфа, дзе пражывае каля 8,5 тыс. чалавек. Плошча рэзідэнцыі – 55 гектараў
– большая за плошчу Ватыкана, з яго 44 гектарамі. Віла, якая служыць у якасці Апостальскага
палацу, была набыта ў 1596 г. папам Кліментам VIII.