Беларускія пілігрымы пачалі сваё падарожжа ў Будслаў
Сёння з Мінска ў Будслаў
вырушыла пілігрымка, ужо 23-ая па ліку. Усё пачалося з ранішняй св. Імшы ў архікатэдральным
касцёле, на якой сабраліся каля 300 чалавек – з беларускай сталіцы і раёна. Далучыліся
да беларусскіх пілігрымаў і вернікі з Расіі і Польшчы. З сабой – самае неабходнае,
галоўнае – спальныя мяшкі, зручны абутак і вада. Пераадолець 125 кіламетраў – гэта
не жарт. Тым больш, што наступныя 6 дзён – менавіта столькі будзе ісці пілігрымка
– у Беларусі абяцаюць сапраўдную спёку – больш за 30. Але такога выпрабавання не баяцца
ні дзеці, ні моладь, ні нават пілігрымы ва ўзросце.
Пасля Святой Імшы благаслаўленне
пілігрымам удзяліў Мітрапаліт Мінска-Магілёўскі арцыбіскуп Тадэвуш Кандрусевіч. Падарожжа
ў санктуарый Маці Божай Будслаўскай ён параўнаў са зваротам дзіцяці да сваёй маці.
“Кожны з нас мае свае праблемы, і як дзіця ідзе з імі найперш да сваёй маці, так і
мы ідзём да нашай нябеснай маці. Ідуць і моладзь, і старэйшыя, і з дзецьмі таксама.
Гэта вельмі важная падзея – сведчанне нашай веры і спосаб новай евангелізацыі. Я спадзяюся,
што гэта пілігрымка прынясе шмат духоўных плёнаў”. Сваё благаслаўленне на шчаслівае
падарожжа ўдзяліў таксама Апостальскі нунцыі ў Беларусі арцыбіскуп Клаўдыё Гуджэроцці.
Іерархі таксама далучацца да пілігрымкі – арцыбіскуп Тадэвуш Кандрусевіч ужо
4 ліпеня праедзе частку шляху разам з велапілігрымкай, а арцыбіскуп Клаўдыё Гуджэроцці
далучыцца да пілігрымаў перад самым Будславам. Заўтра з Мінска таксама выйдзе так
званая пакутная пілігрымка – на хлебе і вадзе. Ужо ў дарозе і пілігрымы з Баранавічаў,
гэта самая доўгая пілігрымка, якая будзе доўжыцца 9 дзён.
У гэтым годзе святкаванні
ў Будславе будуць праходзіць 6 і 7 ліпеня. Да гэтага часу з розных куткоў Беларусі
ў санктуарый прыдуць шматлікія пілігрымы, галоўнае для якіх – праслаўляць Хрыста,
маліцца і дзяліцца добрым настроем.