"Shqipja dhe gjuhët ballkanike" është vepra më e fundit që vjen si rezultat i punës
së dy Akademive Shkencore, të Shqipërisë dhe Kosovës. Në këtë vepër janë të përfshira
kumtesat shkencore të 46 studiuesve ballkanas. Libri u promovua dje në Akademinë e
Shkencave të Shqipërisë. Sipas redaktorit të librit, akademikut Rexhep Ismajli, gjuha
shqipe zë vendin kryesor dhe është ndër më të vjetrat si dhe greqishtja e vjetër. Në
takimin që u bë për këtë vepër, gjuhëtari i njohur Kolec Topalli e vë theksin edhe
te shikimi i gjuhës shqipe si degë më vete të grupit indoeuropian si dhe në krahasim
me gjuhët e tjera ballkanase. Sipas akademikëve, falë këtyre studimeve përfitimet
nga hulumtime të tilla janë të rëndësishme jo vetëm për shkencën e ballkanologjisë,
por edhe për vetë shoqërinë tonë. Botimi "Shqipja dhe gjuhët ballkanike" është
fryt i konferencës shkencore me pjesëmarrje të brezave të ndryshëm të studimeve gjuhësore
nga bota shqiptare dhe nga vendet e tjera të Ballkanit, që u organizua në fund të
vitit që shkoi. Në konferencën shkencore morën pjesë gjuhëtarë nga Kosova, Shqipëria,
Maqedonia, Shtetet e Bashkuara të Amerikës, Franca, Italia, Austria, Greqia, Rusia,
Gjermania, Polonia, Çekia, Moldavia, Mali i Zi etj.