Figura e Shën Pjetrit, të parit ndërmjet Apostujve, ishte në qendër të vëmendjes gjatë
katekizmit të Papës Benedikti XVI mbajtur në audiencën e përgjithshme të së mërkurës,
më 17 maj 2006, në Sheshin e Shën Pjetrit në Vatikan. Papa shpjegoi shëmbëlltyrën
njerëzore e shpirtërore të peshkatarit të Galilesë, që i besoi plotësisht Krishtit
e u bë kështu protagonist i një aventure të madhe. Pjetri – tha Papa- përveçse personazh
historik – siç e dëshmojnë, ndërmjet tjerash, gërmimet arkeologjike të kohëve të fundit
në Kafarnao, - është njeriu simbol i një feje guximtare e të përvuajtur në Hyjin,
fe që nuk pretendon të japë një recetë për ta shndërruar krishterimin sipas mendimit
tonë. Pjetri, peshkatar që drejton një grup të vogël familjar, i cili peshkon në
liqenin e Gjenezaretit, njeri pakëz i vrazhdë, por me natyrë shumë të ndjeshme, kur
është fjala për sendet e shpirtit, është në pritje të zbulesës mesianike. Jeta e tij
ndryshon përgjithmonë në një nga ditët e zakonshme, kur një njeri tjetër, një rabbì
– apo mësues, e shndërron varkën e tij në “katedër” dhe, përmes simbolit të një peshkimi
sa të begatë, aq të pabesueshëm, i kërkon ta ndjekë nëpër detet e njerëzimit. Në figurën
së Simonit, peshkatarit të Galilesë, 45 mijë besimtarët e pranishëm në audiencë, panë
vetveten, me bindjet e ligështitë e fesë së tyre. Benedikti XVI e pikturoi kështu
portretin e Pjetrit, që do të themelonte, me vdekjen e tij mbi Kodrinën e Vatikanit,
selinë apostolike të Kishës së Romës: “Ishte hebré besimtar, plot shpresë në praninë
vepruese të Hyjit në historinë e popullit të vet, i brengosur sepse nuk po e shihte
këtë veprim të fuqishëm ndër ngjarjet e kohës, në të cilat ishte dëshmitar. Simoni
në Ungjill na paraqitet njeri i vendosur e i rrëmbyer; ai është gati t’i mbrojë arsyet
e veta edhe me forcë – kujtojmë këtu përdorimin e shpatës në kopshtin e Gjetsemanit.
Por njëkohësisht nganjëherë tregohet edhe i padjallëzuar e frikacak; gjithsesi mbetet
gjithnjë i ndershëm, deri në pendimin më të sinqertë…”. Duke folur për personazhin
më të njohur e më të përmendur në Besëlidhjen e Re pas Jezusit: 154 herë me emrin
simbolik Pjetër–Shkëmb, me të cilin e thirri për herë të parë Krishti e 9 herë me
emrin origjinal në gjuhën aramajke, Kefë – Papa Ratcinger vuri në dukje disa fragmente
të veçanta të Ungjijve, të cilat në fillim na zbulojnë figurën e një njeriu krejt
të thjeshtë, që më pas fiton epërsinë shpirtërore të Apostullit. Kur e shohim për
herë të parë në skenën ungjillore, ai është burrë i pjekur e peshkatar i regjur. Por
kur njeriu i panjohur, që sapo i ka dhënë mësim turmës nga varka e tij, i kërkon të
dalë në det të hapur për të peshkuar, Pjetri e harron se është ai mjeshtër peshkimi
dhe, duke i besuar Zotit, del në det: “Jezusi nuk ishte specialist peshkimi, e
megjithatë Simoni i beson këtij Rabbì, këtij Mësuesi, që nuk i jep përgjigje, por
e fton t’i besojë. Pjetri pranon t’ia hyjë kësaj aventure të madhe: është fisnik,
i njeh kufizimet e veta, por beson në atë që e thërret dhe ndjek ëndrrën e zemrës
së vet. Thotë po dhe bëhet nxënës i Jezusit”. Çasti i dytë ka të bëjë me ngjarjen
e Çezaresë së Filipit, kur Pjetri, duke pohuar “Ti je Krishti”, mbart në vetvete,
në embrion – shpjegoi Papa – besojmën e ardhshme të fesë në Kishë. Ky pranim nuk është
ende plotësisht i vetëdijshëm, sepse Pjetri rebelohet kur e dëgjon Krishtin duke folur
për mundimet që do të pësojë, madje edhe e qorton. Por edhe në këtë qëndrim humaniteti
i peshkatarit pasqyron humanitetin tonë, dmth të njerëzve, që do të parapëlqenin më
shumë “njeriun hyjnor” i cili e ndryshon botën sipas shpresave tepër njerëzore, sesa
“Hyjin njerëzor” që përkundrazi, e trondit, duke zgjedhur rrugën e përvujtërisë e
të mundimeve. E këtu Pjetri mëson ligjin kërkues të ndjekjes së Krishtit: “Më duket
se gjithë figura e tij është ngushëllim e mësim i madh për ne. Pjetri na thotë: “Ti
mendon se ke recetën e se duhet ta shndërrosh botën e krishterimit, por rrugën e njeh
vetëm Zoti, i cili më thotë: ‘Eja pas meje!’, sepse është Ai vetë ‘Rruga’, e ‘Vërteta’,
‘Jeta’.