Benedikti XVI zonat e dëmtuarit nga tërmeti në veri të Italisë: Kisha qëndron pranë
popullsisë në vështirësi
Shenjë dashurie e shprese: me këtë synim, sot paradite, Papa Benedikti XVI shkoi në
Rovereto të Novit, një nga qendrat e prekura nga tërmeti në veri të Italisë. Vizitë
e shkurtër, por shumë e ndjerë, përmes së cilës, Ati i Shenjtë deshi të përqafonte
popullsitë e dëmtuara, sidomos në zonën e Emilia Romanjës. Kisha, tha Papa, do t’u
qëndrojë pranë këtyre popullsive. Gjithashtu, kujtoi me emocion don Ivan Martinin,
meshtarin, që humbi jetën, nën rrënojat e kishës së tij në Rovereto, kushtuar Shën
Katerinës së Aleksandrisë. Nga Benedikti XVI, edhe një thirrje e fuqishme drejtuar
institucioneve, për të mos i braktisur njerëzit në nevojë, ndërsa takohej me 50 vetë,
përfaqësues të familjeve të dëmtuara. Papa përshëndeti edhe ipeshkvijtë, kryebashkiakët,
famullitarët, përfaqësuesit e Mbrojtjes Civile dhe vullnetarët e shumtë, të impenjuar
në ndihmë të popullsisë. “Ndjeja gjithnjë
e më shumë dëshirën për të ardhur vetë në mesin tuaj”: kështu u tha Papa të dëmtuarve
nga tërmeti, të cilëve iu drejtua me thjeshtësinë e atit, që dëshiron të rrijë me
bijtë e vet, në çastin kur kanë më shumë nevojë. Vizita ishte e shkurtër, por u dha
banorëve guxim të madh, siç theksoi presidenti i Rajonit të Emilia Romanjës, Vasko
Errani: “Këto ditë të vështira, Atë i Shenjtë, lutja Juaj, solidariteti Juaj
dhe vizita Juaj e sotme na ngushëllojnë, na thonë se mund e duhet ta fitojmë këtë
sfidë”. E sfida e rindërtimit nuk është aspak e lehtë. Ky popull, vërejti me
hidhërim kardinali Karlo Kafarra, kreu i ipeshkvijve të Emilia Romanjës, humbi ç’kishte
më të dashur: “shtëpitë, kishat, bashkinë, vendin e punës”. E megjithatë, nuk e ka
humbur fenë e shpresën: “Para disa ditësh, një fëmijë, në emër të shumë fëmijëve
të tjerë më tha: ‘Ka shumë çarje në shtëpitë tona, por asnjë në zemra’… Po, o Atë
i Shenjtë, megjithëse i munduar rëndë, ky popull po gjen një bashkim më të vërtetë
e më të thellë”. Një fe, vazhdoi kryeipeshkvi i Bolonjës, që forcohet falë
dëshmisë heroike të shumë meshtarëve, si don Ivan Martini, i cili humbi jetën gjatë
shembjes së kishës, ku shërbente në Rovereto. E pikërisht nga ky meshtar, filloi fjala
e Benediktit XVI për të dëmtuarit nga tërmeti: “Duke nderuar kujtimin e tij,
ju përshëndes veçanërisht të gjithë juve, të dashur meshtarë, e të gjithë bashkëvëllezërit,
që po tregojnë dashurinë bujare për popullin e Zotit, siç ka ndodhur edhe në kohë
të tjera të vështira për këto troje”. Papa shprehu keqardhjen për dëmet e shkaktuara
nga tërmeti, të cilat kanë hapur plagë në gjirin e shoqërisë vendase, por vuri në
dukje edhe sa e sa duar, që po punojnë për t’i shëruar ato. Pikërisht, dëshirës së
zjarrtë për të rifilluar jetën me forcë e guxim, Benedikti XVI i kushtoi një pjesë
emocionuese të fjalimit të tij: “Nuk jeni e nuk do të jeni vetëm! Gjatë këtyre
ditëve, në mesin e shkatërrimit e dhimbjes së madhe, ju keni parë e dëgjuar sa njerëz
po punojnë për t’ju shprehur afërsinë, solidaritetin e dashurinë e tyre; e kjo, përmes
shumë shenjave e ndihmave konkrete. Prania ime në mesin tuaj dëshiron të jetë njëra
nga këto shenja dashurie e shprese”. Papa falenderoi vullnetarët, ata që e
dëshmojnë konkretisht solidaritetin. E nuk mbeti pa u drejtuar një thirrje të fuqishme
institucioneve, çdo qytetari, që, ashtu si Samaritani i Mirë, të mos kalojë indiferent
para nevojtarëve. Benedikti XVI siguroi se Kisha do të jetë gjithnjë pranë të dëmtuarve
nga tërmeti: “Kisha është pranë jush e do të jetë afër me lutjen e me ndihmën
konkrete të organizatave të saj, në veçanti të Karitasit, që do të impenjohet edhe
në rindërtimin e indit shoqëror të famullive”. Afërsi konkrete e shpirtërore!
Papa kujtoi fjalët e Psalmit 46: “Hyji është për ne strehim dhe fuqi…Prandaj as s’do
të trembemi edhe nëse lëkundet toka”: “Siguria për të cilën flet (psalmi) është
ajo e fesë, prandaj, po, mund të kemi frikë, ankth – i pati provuar edhe Jezusi –
por kemi sidomos sigurinë se Zoti është me ne; ashtu si fëmija, që e di se mund të
mbështetet gjithnjë tek e ëma dhe i ati, sepse e ndjen se ata e duan, e kërkojnë,
sido të ndodhë”. Megjithëse të vegjël e të brishtë, theksoi Papa, jemi të sigurtë
në duart e Zotit, nëse ia besojmë veten dashurisë së Tij, të fortë si shkëmbi. Mbi
këtë shkëmb mund të ndërtojmë, vazhdoi Benedikti XVI, duke u kujtuar italianëve me
çfarë fryme solidariteti, rindërtuan vendin e rrënuar nga Lufta II Botërore. E vlerësim
të veçantë, tregoi pikërisht për popullin e Emilia Romanjës, të cilin e çmon gjithë
Italia për humanitetin, për miqësinë e vërtetë, për aftësinë për punë e për ta gëzuar
jetën: “Qëndrojini besnikë thirrje suaj për të qenë njerëz vëllazërorë e solidarë
e do të përballoni çdo gjë me durim e vendosmëri, duke refuzuar tundimet, që fatkeqësisht,
shfaqen gjatë këtyre çasteve të dobësisë e të nevojës”.