Праваслаўная і каталіцкая моладзь разам шукаюць агульную этычную платформу
25 чэрвеня ў Беларусі
пачаў працу Летні багаслоўскі інстытут-2012. Гэта 13-ая па ліку Міжнародная навуковая
канферэнцыя па актуальных пытаннях сучаснай теалагічнай адукацыі. Ніколі за час яе
існавання ўдзельнікаў не выбіралі паводле канфесійнай прыналежнасці – слухачамі былі
як праваслаўныя, так і католікі, а нават тыя, хто толькі пачаў знаёміцца з хрысціянскай
рэлігіяй у тэорыі і на практыцы. Але ўпершыню ў гэтым годзе ЛБІ мае міжканфесійны
характар канцэптуальна, паведаміў кіраўнік аддзела катэхізацыі Мінскай епархіі і нязменны
выкладчык канферэнцыі айцец Аляксандр Шымбалёў.
“Міжканфесійны дыялог і павінен
быць дыялогам. Людзі павінны сустракацца і размаўляць. Павінны бачыць адзін аднаго
і размаўляць у гэтай высока інтэлектуальнай установе. Не проста на бытавым узроўні,
дзе мы і так сустракаемся з прадстаўнікамі розных рэлігій. Мы запрашаем выкладчыкаў,
якія з’яўляюцца адукаванымі людзьмі, і слухачоў, якія таксама адукаваныя і прагнуць
больш ведаць аб тэалогіі. Заўсёды вельмі-вельмі цікавая размова ідзе. Трэба каб быў
сапраўдны навуковы дыялог”.
Характар канферэнцыі і вызначыў яе склад – роўна
на палову слухачы і выкладчыкі – праваслаўныя і католікі. Тэма гучыць так – “Хрысціянская
сучасная этыка ў сённяшнім свеце на платформе праваслаўна-каталіцкага дыялогу”. Спектр
тэм вельмі шырокі – “Навука і рэлігія”, “Гісторыя і прынцыпы святасці”, “Багаслоўе
культуры”. А таксама курс па псіхалогіі, прысвечаны працы з людзьмі, якія жывуць побач
з залежнымі ад алкаголю і наркотыкаў, іх называюць яшчэ сузалежнымі – гэта можа спатрэбіцца
ў душпастырскай працы і парафіяльным кансультаванні, адзначыў айцец Аляксандр Шымбалёў.
“Да нас прыедуць гісторыкі з БДУ, педагогі розных напрамкаў, карэспандэнты
таксама, прадстаўнікі мас-медыя. З боку каталіцкага касцёла – слухачы катэхетычнага
коледжа ў Баранавічах. Усё гэта людзі, якія сутыкаюцца з багаслоўскімі пытаннямі ў
сваім жыцці вельмі часта і таму жадаюць пашырыць свае веды. Можна пасябраваць і пасля
канферэнцыі працягваць інтэлектуальныя размовы і сяброўства”.
Два тыдні цікавых
лекцый удалечыні ад гарадскога шуму. Цішыня курортнай зоны Нарач, дзе пасяліліся ўдзельнікі
канферэнцыі, будзе толькі спрыяць таму, каб лепш пачуць адзін аднаго і ўбачыць перш
за ўсё спачатку чалавека, а потым ужо прадстаўніка нейкай канфесіі.