Кс. Фэдэрыка Ламбардзі
звяртае ўвагу на праблемы бежанцаў і неабходнасць аднаўлення ў іх надзеі і даверу
да людзей і жыцця. У сваёй аўтарскай рубрыцы “Octava Dies” на Ватыканскім радыё, ён
нагадаў, аб малітоўным чуванні пад назвай “Смерць надзеі”, якое прайшло ў Рыме з нагоды
Сусветнага дня бежанца, што адзначаецца 20 чэрвеня. Чуванне было малітвай памяці аб
тых, хто загінуў падчас драматычных уцёкаў ад пераследу, парушэння правоў чалавека,
голаду, з многіх краін свету, адзначыў кс. Ламбардзі. “Яны паміраюць ад удушша ў грузавіках,
ад прагі і голаду, перасякаючы пустыню, паміраюць у выніку нападаў злачынцаў, пераходзячы
праз рэкі і горы, спрабуючы пераплыць мора на маленькіх і небяспечных лодках. Гаворка
ідзе аб 20 тыс. загінуўшых толькі за апошнія гады на шляху ў Еўропу, і амаль 3 тыс.
загінуўшых толькі ў гэтым годзе, пры спробе дасягнуць Італіі праз Міжземнае мора”,
- адзначыў ён.
Кс. Ламбардзі падкрэсліў, што бежанцы не імкнуцца выключна ў
багатыя краіны. Ён прывёў прыклад лагера для бежанцаў Мбера ў Маўрытаніі, куды на
працягу апошніх месяцаў прыбыло каля 70 тыс. чалаввек, ратуючыся ад жахаў грамадзянскай
вайны. Езуіт адзначыў, што падобныя лагеры існуюць у многіх краінах Чорнага кантынента.
“Гісторыя
аднаго бежанца, больш шакуючая, чым гісторыя другога. З лагера Мбара прыйшла гісторыя
аб трох безабаронных і спалоханых маладых жанчынах з маленькімі дзецьмі, мужы якіх
зніклі падчас канфіктаў, а самі яны сталі ахвярамі сексуальнага насілля. Але колькі
яшчэ іншых, колькі іншых? І яшчэ, як і куды ўцякаць, калі больш не маеш нічога і пазбаўлены
ўсялякіх сувязяў?”, - пытаецца кс. Ламбардзі.
Дырэктар Ватыканскага радыё падкрэсліў,
што гэтым людзям неабходна даць прытулак і ежу, але яны патрабуюць таксама таго, каб
быць пачутымі, зразуметымі, падтрыманымі па-чалавечы і духоўна. “Неабходна аднавіць
мінімум іх даверу да іншых і жыцця, каб іх надзея магла жыць”, - адзначыў езуіт. На
яго думку, “гэта адзін з самых вялікіх выклікаў, якія стаяць перад вернікамі і людзьмі
добрай волі, калі мы па-сапраўднаму хочам пачаць з самых апошніх пры будаванні лепшага
свету”.