Бэнэдыкт XVI: эканоміка і праца блізкія хрысціянскаму пасланню
22 чэрвеня ў Клеменційскай
Зале Апостальскага палаца ў Ватыкане Бэнэдыкт XVI прыняў на аўдыенцыі каля 100 членаў
найбуйнейшай італьянскай сельскагагападарчай асацыяцыі “Coldiretti”. Пантыфік выразіў
сваё захапленне дзейнасцю арганізацыі на карысць сем’яў, якія жывуць і працуюць у
італьянскіх вёсках. “Грамадства, эканоміка і праца, не з’яўляюцца сферамі выключна
свецкімі і далёкімі ад хрысціянскага паслання”, - сказаў Святы Айцец. Ён падкрэсліў,
што “Касцёл ніколі не быў абыякавым да якасці жыцця людзей, умоваў іх працы, наадварот,
заўсёды адчуваў абавязак клапаціцца аб чалавеку і тых асяродках, дзе ён жыве і працуе,
каб яны станавіліся пастаянна месцамі больш чалавечымі і ачалавечваючымі”. Бэнэдыкт
XVI адзначыў, што для гэтага Касцёл карыстаецца дапамогай арганізацый, якія чэрпаюць
сваё натхненне з сацыяльнага навучання Касцёла, да якіх і належыць “Coldiretti”.
“Працяглы
эканамічна-фінансавы крызіс, з яго невызначанымі наступствамі, ставіць прадпрымальнікаў,
якія працуюць ў сферы сельскай гаспадаркі і рыбалоўства, перад абліччам выклікаў малавядомых
і безумоўна цяжкіх, - сказаў Папа. - Вы пакліканы да таго, каб адказаць на іх як хрысціяне,
развіваючы абноўленае і глыбокае адчуванне адказнасці, практыкуючы салідарнасць і
ўзаемнае дзяленне”, -.
Святы Айцец звярнуў увагу, што ў фундаменце сучаснага
эканамічнага крызісу знаходзіцца крызіс маральны, і, каб з яго выйсці, у першую чаргу
неабходна “адкрыць нанава тыя духоўныя каштоўнасці, ад якіх потым народзяцца ідэі,
праекты і дзеянні”.
“Праз вашу сацыяльную дзейнасць вы сведчыце аб навізне
Евангелля, і таму маеце патрэбу ў пастаяннай апоры ў Хрысце, у малітве, каб чэрпаць
духоўную энергію і з новым запалам рэалізоўваць вашу дзейнасць”, - адзначыў Бэнэдыкт
XVI.