Atë Federiko Lombardi: Komisioni i kardinajve vazhdon hetimet për daljen e dokumentave
të rezervuara nga Vatikani
Zëdhënësi i Selisë së Shenjtë, atë Federiko Lombardi foli sot me gazetarët edhe për
çështjen e hetimeve, lidhur me daljen e dokumentave të rezervuara nga Vatikani. Komisioni
kardinalor, tha ai, është i lirë të lëvizë në të gjitha drejtimet, i jep llogari Papës,
por jashtë hetimeve të njohura e marrjes në pyetje të të akuzuarit të vetëm, Paolo
Gabriele, nuk ka folur për persona të tjerë të përfshirë në këtë çështje. Vërtet, komisioni,
i përbërë nga tre kardinaj (Julian Herranz, Salvatore De Giorgi e Jozef Tomko), ka
marrë në pyetje, deri tani, 23 vetë, pak a shumë 4-5 vetë çdo javë. Javës së kaluar
kanë pyetur sërish Paolo Gabrielen e të shtunën pasdite, i kanë raportuar Benediktit
XVI rezultatet e hetimeve, që vazhdojnë. “Të gjithë – theksoi atë Lombardi – duam
të dimë më shumë, por duhet të presim e nuk është e drejtë të bëjmë hipoteza, duke
u bazuar në burime të diskutueshme”: “Kanë dalë emrat e dërguesve e të bashkëpunëtorëve:
kush tha se kanë dalë dërguesit e bashkëpunëtorët? Janë hipoteza jashtëzakonisht të
pabazuara”. Duke komentuar intervistën e Sekretarit të Shtetit të Vatikanit,
kardinalit Tarçizio Bertone për revistën “Familja e Krishterë”, në të cilën prelati
i lartë përjashton përfshirjen e ndonjë kardinali në rastin Vatileaks, atë Lombardi
nënvizoi: “Në intervistën e kardinalit Bertone për ‘Familjen e Krishterë’, më
duket se pika më e rëndësishme është ftesa për të reflektuar mbi marrëdhëniet ndërmjet
lirisë së shtypit, lirisë së shprehjes e mbrojtjes së privatësisë së personit… Kemi
të bëjmë me të drejta, që nganjëherë, janë në konflikt. Duhen verifikuar gjithnjë
kufijtë e përdorimit të tyre, sipas korrektesës etike e normave juridike”. Atë
Lombardi sqaroi se gazetarët e akredituar do të mund të vizitojnë IOR-in (Institutin
e Veprave Fetare, i njohur si banka e Vatikanit) më 28 qershor. E parashikuar për
datën 22, kjo vizitë u shty, pasi ishte i zënë salloni i Institutit. Përsa i përket
raportit të “Moneyval” për transparencën financiare në Vatikan, atë Lombardi nënvizoi
se vetë organizmi kërkon të mos publikohen vlerësimet e tij, para se të miratohen
nga asambleja, prandaj çdo dalje në shtyp, duhet konsideruar si dhunim i rregullave
të “Moneyval”. Së fundi, zëdhënësi i Selisë së Shenjtë i këshilloi gazetarët të mos
i konsiderojnë çështjet në diskutim në Vatikan si luftë pushteti, apo si komplote,
por si dinamikë e zakonshme në vendimarrjen e një shteti, ku jo të gjithë mund të
jenë dakord me njëri-tjetrin.