Да якога часу дынаміка
насілля ў Сірыі будзе працягваць нарастаць і людзі будуць паміраць і ўцякаць са сваіх
дамоў? Такое пытанне ставіць кс. Фэдэрыка Ламбардзі ў сваёй штотыднёвай рубрыцы на
нашым радыё “Octava Dies”. Ён адзначыў, што з розных куткоў Сірыі штодзённа працягваюць
паступаць навіны аб усё большым нарастанні, на працягу амаль 15 месяцаў, масавых забойстваў
нявінных людзей, розных узростаў і веравызнанняў. “Сёння становіцца ўсё больш тых,
хто сцвярджае, што неабходна казаць аб сапраўднай сітуацыі грамадзянскай вайны”, -
сказаў дырэктар Ватыканскага радыё. Езуіт звярнуў увагу на тое, што Сірыя заўсёды
характарызавалася мірным суінаваннем паміж прадстаўнікамі розных плыняў мусульманскага
свету, экуменічнымі адносінамі паміж хрысціянамі розных канфесій, а таксама спакоем
у міжрэлігійных адносінах паміж хрысціянамі і мусульманамі. Ён узгадаў, аб “незабыўным
візіце” Яна Паўла ІІ у гэту краіну ў 2001 г. і адзначыў, што зараз Сірыя перажывае
час насілля, хаоса і пагрозы падзелу. Кс. Ламбардзі узгадаў словы Апостальскага нунцыя
ў Сірыі арцыбіскупа Дзэнары, які назваў існуючую сітуацыю “павольным сыходам у пекла”.
“Чаканні
свабоды і большага ўдзелу у палітычным жыцці, якія ёсць у многіх маладых сірыйцаў,
а таксама ў іншых краінах рэгіёна агорнутых ветрам пераменаў, не былі належна выслуханы
кіраўнікамі, у той час як ў лагер апазіцыі ўвайшлі прыхільнікі насілля. Нягледзячы
на неаднаразовыя заклікі Папы і іншых рэлігійных і свецкіх лідэраў, міжнародная супольнасць
здаецца яшчэ няздольнай дзейнічаць эфектыўна”, - сказаў езуіт.
Кс. Ламбардзі
адзначыў, што на існуючую сітуацыю ўплывае адчувальнае для міжнароднай палітычнай
раўнавагі месцазнаходжанне Сірыі. Ён нагадаў, што план па выхадзе з канфлікту прапанаваны
былым генеральным сакратаром ААН Кофі Ананам не быў ажыцяўлены, а гіпотэзы аб міжнародным
узброенным умяшальніцтве з’яўляюцца надзвычай трывожнымі. “Да якога часу дынаміка
насілля ў Сірыі будзе працягваць нарастаць і людзі будуць паміраць і ўцякаць са сваіх
дамоў?”, - пытаецца кс. Ламбардзі.
Ён адзначыў, што для веруючых цяперашні
час, з’яўляецца момантам для спачування, малітвы, дапамогі пакутуючым, чым гэта магчыма,
запрышэння да дыялога на розных узроўнях, пробліскаў надзеі. “Не забудзем і непакінем
Сірыю”, - заклікаў кс. Ламбардзі.