Dita për shenjtërimin e Meshtarëve. Mësimi i Papës: në shërbim të Kishës, sipas Zemrës
së Krishtit.
“Pa meshtarë, nuk mund të ketë Kishë”: kështu u shpreh kardinali Mauro Piaçenza, prefekt
i Kongregatës për Klerin, në një intervistë dhënë gazetës italiane “Avvenire”, me
rastin Ditës së sotme botërore për shenjtërimin e meshtarëve. Lidhet ngushtë, kjo
ditë, me Solemnitetin e Zemrës së Krishtit, që kremtohet sot. Për temën e shenjtërimit
të meshtarëve sipas Zemrës së Krishtit, Papa ka reflektuar dendur, posaçërisht gjatë
Vitit Meshtarak 2010. “Kisha dhe bota
kanë nevojë për meshtarë të shenjtë!”. Benedikti XVI e përsërit këtë me ngulm, që
në fillim të papnisë. E kjo thirrje bëhet edhe më e ngutshme, përballë plagës së tmerrshme
të shpërdorimeve të disa meshtarëve mbi të miturit. Papa e denoncon me forcë shkandullin
e barinjve, të shndërruar në cuba të deleve, që u janë besuar. Kemi nevojë, pohon
me forcë, për meshtarë sipas Zemrës së Krishtit. Meshtarë, që i përngjasin Shën Gjon
Maria Vianejt, model gjithnjë aktual për të gjithë meshtarët: “Po
ta shikojmë mirë, famullitari i Arsit u bë shenjt sepse ishte i dashuruar me Krishtin.
E fshehta e vërtetë e suksesit të tij baritor ishte pikërisht dashuria që ushqente
për misterin eukaristik të kumtuar, të kremtuar e të jetuar, që në shpirtin e tij
u bë dashuri për delet e Krishtit, për njerëzit, që kërkojnë Zotin”(Audienca
e përgjithshme, 5 gusht 2009). Kisha, nënvizoi Papa në fillim të Vitit Meshtarak,
që kremtonte 150-vjetorin e Famullitarit të Arsit, ka nevojë për meshtarë si Shën
Gjon Vianej, që diti të shuajë etjen e njeriut të kohës së tij për të vërtetën. Kohë
e vështirë, periudhë e Francës pas-revolucionare, na kujton Papa, që provonte një
lloj diktature të racionalizmit, e cila kishte për qëllim ta shlyente praninë e meshtarëve
e të vetë Kishës në shoqëri. Në këto rrethana, Shën Gjon Maria Vianej i jetoi vitet
e rinisë në kushte heroike klandestine, duke përshkuar kilometra e kilometra, në errësirën
e natës, për të marrë pjesë në Meshën Shenjte. Më pas, si meshtar, dëshmoi me jetën
e vet se racionalizmi, asokohe sundues, ishte i paaftë për t’i plotësuar kërkesat
shpirtërore të njeriut e, prej këndej, nuk do të kishte jetë të gjatë. Figura e tij
vijon të na kujtojë se Kisha ka nevojë për barinj, që i ndihmojnë besimtarët të provojnë
sa i mëshirshëm është Zoti, për meshtarë, që jetojnë si dëshmitarë të bindur të Krishtit:
“Në se shfletojmë historinë, mund të vërejmë sa faqe risimi shpirtëror e
shoqëror u shkruan me ndihmesën vendimtare të meshtarëve katolikë, të frymëzuar vetëm
nga pasioni për Ungjillin e për njeriun, për lirinë e tij të vërtetë, fetare e civile.
Sa nisma për zhvillimin e gjithanshëm njerëzor nisën nga intuita e zemrës meshtarake”
(Lutja e Engjëllit të Tënzot, 13 qershor 2010). Meshtari,
vëren akoma Papa, është dhuratë e Zemrës së Krishtit; dhuratë për Kishën e për botën.
Jo rastësisht, prandaj, Viti Meshtarak 2010 u mbyll pikërisht në solemnitetin e Zemrës
së Krishtit: “Nga Zemra e Birit të Hyjit, përplot me dashuri, burojnë të
gjitha të mirat e Kishës e, posaçërisht, thirrjet drejtuar atyre njerëzve që, të pushtuar
nga Zoti Jezus, lënë gjithçka për t’iu kushtuar krejtësisht shërbimit të popullit
të krishterë, duke ndjekur shembullin e Bariut të Mirë”. Meshtari, nënvizon
Papa, duket të bëhet një me dashurinë e Krishtit.Vetëm kështu mund ta kumtojë Fjalën
e Zotit, pa u ndikuar nga kulturat ose mendësitë sunduese: “Ndjehet
një nevojë e madhe për meshtarë, që t’i flasin botës për Zotin e që t’ia paraqesin
Zotin botës: njerëz që nuk bien pré e modave kalimtare kulturore, por janë të aftë
ta jetojnë vërtetësisht atë liri, të cilën mund ta dhurojë vetëm Zoti, kur i përket
Atij plotësisht”(Audienca me Kongregatën për Klerin, 12 mars 2010). Papa
nënvizon se profecia më e nevojshme, është ajo e besnikërisë që, duke u nisur nga
besnikëria e Krishtit për njerëzimin, përmes Kishës e shërbimit të meshtarisë, e
ndihmon meshtarin ta jetojë meshtarinë e vet në bashkim të plotë me Zotin e me Kishën.
Prandaj edhe sot vërehet nevoja që meshtarët ta dëshmojnë mëshirën e pakufishme të
Zotit, me një jetë të pushtuar nga Krishti, e ta mësojnë këtë që në vitet e përgatitjes
së tyre në seminar. Në të vërtetë, vijon të reflektojë Ati i Shenjtë, meshtari
nuk i përket më vetvetes, po bëhet ‘pronë’ e Zotit. Fakti që meshtari i përket “një
Tjetri, shton Papa, duhet të njihet nga të gjithë, përmes një dëshmie të qartë. Prandaj
Benedikti XVI ngulmon posaçërisht tek formimi intelektual e shpirtëror i meshtarëve,
të cilët duhet t’ia kushtojnë plotësisht mendje e zemër misionit meshtarak. Në se
Kisha nuk ka meshtarë të përgatitur, mendon Papa, njerëzve do t’u mungojë ndihma e
domosdoshme shpirtërore.