Святому Пасаду будзе належаць дамен .CATHOLIC

13 чэрвеня Міжнародная карпарацыя па размеркаванні адраснай прасторы Сеткі (ICANN) апублікавала спіс заявак на новыя дамены верхняга ўзроўню. ICANN адобрыла стварэнне выдзеленых даменных зон у чэрвені 2011 г., а тэрмін прыёму заявак на іх рэгістрацыю скончыўся 31 мая 2012 г. Да гэтага моманту было пададзена 1930 заявак. Па правілах, прэтэндаваць на ўласны gTLD (па-ангельску generic Top-Level Domain - агульны дамен верхняга ўзроўню) маглі толькі дзяржаўныя і прыватныя арганізацыі. Пры гэтым на 231 дамен было пададзена больш за адну заяўку, усяго ж канкуруючых заявак налічваецца 751.

4 заяўкі было пададзена Папскай радай па сродках масавай камунікацыі. Акрамя дамена на лацінцы .CATHOLIC, Святы Пасад прэтэндуе на 3 аналагічных IDN-дамена (па-ангельску Internationalized Domain Names - даменныя імёны, якія змяшчаюць сімвалы нацыянальных алфавітаў). Гэта дамены на кірыліцы (.Католик), арабскай і кітайскай мовах.